Ibra hmalam hun a chiang lo

AC Milan chuan thuchhuah siamin Zlatan Ibrahimovic chu a khup hliam a zai avangin thla riat bawr vel a chawlh tur thu an puang. Zlatan-a contract neihlai hi thla khat hnuah a thi dawn a, Swedish striker hian contract a la pawhsei loh avangin a hmalam hun a chiang lo.

Kum 40 mi Ibrahimovic khup vei lam hi Dr Bertrand Sonnery-Cottet-a'n Hôpital Jean Mermoz, Lyon-ah a zaisak a, Milan club Medical Director Stefano Mazzoni-a'n a awmpui. Thla khat liam ta khan Ibra chuan, "Ka dinhmun thlir hian goalline ka hnaih ve zel a, ka hlauthawng rilru hle. Inkhelh zawhah eng nge ka tih ang. Tih theih chu ka ngah a, hmun hrang hrang aṭangin sawmna pawh ka dawng ang. Mahse khelmuala phurna min pek ang hi thil dangah chuan ka nei ve thei lo ang," tiin inkhelh chawhsan a hreh thu a sawi.

Zlatan hian a seilenna hmun Malmo aṭangin bul a ṭan a, Ajax aṭanga hriat hlawh ṭanin Juventus, Inter Milan, Barcelona, Paris Saint Germain, Manchester United, LA Galaxy leh AC Milan tan te a khel tawh. Swedish striker hian sulhnu ṭha tak a nei a; Eredivisie, Serie A, La Liga leh Ligue 1 a champion vek tawh a ni.