Barca-in A Leagues All Star an hneh

Barcelona chuan nipui chawlh hmain Nilaini khan Sydney-ah A Leagues All Star nen friendly match an khel a, Catalan club hian 3-2 in hnehna an chang.

Barca-in Ousmane Dembele hmangin hma an hruai hmasa a, A Leagues All Star hian Reno Piscopo leh Adama Traore hmangin lehthal mah se Catalan club tan Adama Traore leh Ansu Fati ten an khung belh.

Xavi hnuaiah Barca an insiamṭha a, Champions League khel lo thei dinhmuna an din hnuah La Liga-ah pahnihna an ni. Amaherawhchu Catalan club hi sum lama an buai avangin player chelh leh lak kawngah harsatna an tawk.

Barca midfielder Gavi dinhmun a chiang lo a, kum 17 mi Spanish midfielder leh Catalan club hi an indawr mek. Xavi chuan, "Gavi chungchangah chuan ka hlauthawng lo, hun hi a ngai tam ve ṭhin. Chanchin lawmawm kan puan vat theih ka beisei," tiin a sawi.

Frenkie de Jong pawh chhuak tura sawi a ni. Xavi chuan, "De Jong hi key player a ni a, a hmalam hun kan sum dinhmunah a innghat," tiin Dutch midfielder chu chhuak thei a nih thu a sawi.

Barcelona hi Robert Lewandowski nen sawizawm an ni a, Polish striker hian Nou Camp-a kal a duh. Barca president Joan Laporta chuan, "Robert Lewandowski hian Bayern-ah kum khat contract a la nei a, engmah ka sawi thei lo. Player ṭha tak a ni a, kan duh takzet," tiin a sawi.

Lewy hian contract pawhsei tum tawh lo mah se Bayern Munich-in a thlakna tur player ṭha an neih theih loh chuan chelh an pawi ti lo. Chutihrualin Polish striker berin chhuah a duh a, season thara Barca jersey a ha a nih pawhin a mak lo ang.