An chak chuan Arsenal tling dawn Spurs tan player khek a ngai thung?

Zanin dar 11:25 hian Molde khelmualah Europa League khel turin Arsenal an lenglut dawn a, manager Mikel Arteta naute hian hnehna an chang a nih chuan group B aṭangin knockout stage an lut ang.

Gunners hian match thum an khelh tawhah hnehna an chang vek a, a chung berah an awm - zanina an khingpui tur Norway club hi pahnihna nilai an ni thung. North London club hi tlang thei an nih laiin an chak lo a nih erawh chuan Molde nen an point an intluk dawn.

Aston Villa lakah 3-0 ngawta an tlawm hnuah international break an nei a, an rawn kir leh hnua an match hmasa berah Leeds United nen goal awm loin an inhnehtawk - Premier League lamah Arsenal dinhmun hi a duhawm tehchiam lo.

Emirates Stadium lama 4-1 a an hneh tawh Molde lakah chak tura rinkai an ni ang, chutihrualin an inkhelhna tur hi Aker Stadion a nih tawh dawn avangin chesual thei erawh an ni ve tho.

Arteta-a'n hliam vangin a player ṭhenkhat a chhawr thei dawn lo, Leeds an hmachhawn ṭuma hliam tuar Willian leh Bukayo Saka te an la damlo a, midfielder Thomas Partey a chawlh mek bakah Sead Kolasinac leh Mohamed Elneny ten hri leng an kai.

Calum Chambers leh Pablo Mari te an dam tawh a, minute 90 chhung khel tur erawhin an la rintlak loh. David Luiz bakah league lama match thum chhawr theih loh tur Nicolas Pepe chungah engtiangin nge thutlukna a siam dawn tih hriat a châkawm hle.

Rawlthar Reiss Nelson, Joe Willock leh Emile Smith-Rowe te tan hun ṭha a ni thei dawn a, anni ho khawm tur hian tawnhriat nei Alexandre Lacazette leh Shkodran Mustafi te pawh an inlan ngei a rinawm bawk.

Tottenham Hotspur Stadium-ah Ludogorets Razgrad an lenglut dawn a, manager Jose Mourinho naute tan hnehna chan a pawimawh rualin kartawpa Premier League an khelh tur an ngaihtuah tel a ngai dawn.

Group J-ah Spurs, Antwerp leh Lask ten point ruk ṭheuh an nei, zanina North London club mikhual tur Ludogorets erawhin point an la nei lo. Portuguese manager-in a player ṭha ṭhenkhat dahṭha chung pawhin hnehna a chan theih a rinawm.

Premier League hmahruaitu Spurs hian Pathianni zanah Chelsea an lenchilh zui dawn. Mourinho naute hi Blues aiin point hnih chauhin an sang a, an hmahruaina hloh thei an nih dawn avangin Europa League aiin EPL an ngaih pawimawh a rinawm zawk.

Mourinho chuan, "Player ten an theihna zawng zawng an hlan a, rilrua thil dang ngaihtuah loin inkhelh chauh an ngaihtuah chuan result ṭha kan nei ṭhin," tiin Manchester City an hneh hnuah a sawi a, zaninah pawh a naute hi 100% rilru pe turin a beisei leh ang.

Tottenham tan defender pawimawh Toby Alderweireld leh Argentina international Erik Lamela te an inlan thei dawn lo tih a chiang a, midfielder Harry Winks leh right back Matt Doherty te dinhmun a chiang lo - player dang erawh mamawh dana chhawr theih an ni.

Serie A hmahruaitu AC Milan chuan zanin dar 11 hian Lille an lenchilh dawn, club pahnih hi group H hmahruaitu nih inchuh an ni dawn. Lille hian point sarih hmuin hma an hruai mek a, an mikhual tur Milan nen an inthlauhna chu point khat lek a nih avangin inkhel pawimawh a ni dawn.

Milan hian season bul an ṭan fuh hle a, league lamah pawh champion an sawi ngam hial. Mahse, an chetṭhat theih nana mi pawimawh Zlatan Ibrahimovic chu zanin hian an chhawr thei dawn lo, Swede striker hi malpui hliam vangin kar thum vel a chawlh a ngai a ni.

Inkhel ngaihven hlawh tur zingah Napoli an awm. Italian club hian Croatian club Rijeka an mikhual dawn. Gennaro Gattuso naute hi Serie A lamah Milan laka tlawm hlim an ni a, zaninah insiamṭhat nghal an tum ang.

Mizorama inkhel tawh Hoffenheim pawh Czech Republic club Slovan Liberec mualah an lenglut dawn. German club hian hnehna an chang a nih chuan knockout round an lut dawn, match khelh hmabak nei chunga tlin theih kha duhthusam a ni dawn.

Europa League group stage-ah hian group tina a sang pahnih ten knockout round an lut dawn, inelna sang zawk Champions League group stage paltlang zo lo ten last 32 aṭang hian an zawm ve bawk ang.