A vawi 12 nan Ibra-a'n Golden Ball a dawng

Zlatan Ibrahimovic chuan Swedish Football Association-in an pek ṭhin Golden Ball a dawng. Sweden ram chhunga player ṭha ber hnena an hlan ṭhin chawimawina hi ṭum 12 ngawt a dawnna a ni.

Sweden tan match 116 a khelh aṭanga goal 62 khungtu Ibra hi kum 39 mi a ni tawh. A kum tam deuh tawh mah se AC Milan tan a vul mek a, tun season Serie A match ruk a khelh aṭangin goal 10 ngawt a khung tawh.

Ibra chuan, "Beiseina leh thawhrimna nen chuan eng pawh mai hi a thlen theih. Hetiang chawimawina ka dawng thei hi ka lawm, mahni ram chhunga chawimawina dawn hi chu a hlu bik," tiin a sawi.