Ranieri tel lohna Foxes-in Reds an barakhaih

Leicester City-in Premier League nomawi chawipuitu coach Claudio Ranieri an ban hnua an match hmasa berah Liverpool 3-1 in an sawp nghal a, relegation zone an chhuahsan - hetihrual hian season tira champion tum Liverpool tan Champions League khel turin hmabak a hautak sawt.

Thawhṭanni zan King Power Stadium-a inkhelah hian Ranieri ban a nih dan chungchanga in­rawlh anga an sawi Jamie Vardy-a'n a thiam a la theihnghilh lo tih pholangin goal hnih a khung.

Danny Drinkwater-a'n season hmasa Premier League-a midfielder ṭha pawla chhiar tel a nih chhan pholangin goal ro­pui a khung bawk - Reds tana Philippe Coutinho goal khung chu mualpho zualpui khuhtu mai a ni.

Ranieri-a naute
Leicester-in Reds an mikhual tur aiin Ranieri ban a nih chungchangin sawi a hlawh zawk a, King Power Stadium-ah pawh Italian manager a langsar ber!

Claudio thlahna thu inziahna banner hmuh turin a kat nuk a 'Mi dik, mi ṭha, mi ropui. Leicester eng thil nge in tih tak hi?' tihte, 'Hruaitu ropui' tihte, 'Ranieri i player leh club neitute chuan an phatsan si che. Zahthlakin' tihte chu langsar taka ken an ni a, fans ṭhenkhatin Ranieri hmaikawr vuahin Italian coach ropui hi an thlah a, minute 65-naah kum 65-a upa manager an theihnghilh lo tih lantir nan King Power-ah Foxes fan-ten an mobile an chhi eng ṭheuh bawk.

Inkhelh ṭan hmain 'Nessun dorma' tih hla chu play a ni a, he hla hi season hmasaa Foxes-in Premier League nomawi an chawi ṭum khan Ranieri hnampui Andrea Bocelli chuan a sa a, King Power Stadium-ah Ranieri ngainatu fan-te mittui hmuh hmaih theih a ni lo - Italian manager an ngai a, an zingah a awm tawh si lo.

Manager lailawk Craig Shake­speare hoin Leicester player an lo chhuak a, Ranieri tha­chhang dawl ṭhintu manager hian players thar rin aiin season hmasaa an champion-na player te rin a thlang a, 4-4-2 formation hmangin N'Golo Kante awm tawh loh avangin Wilfred Ndidi luhtir a ni.

Inkhel Chu
Inkhel ṭantir aṭangin Leices­ter City an hmuhnawm a, a sawifiah dan awlsam ber chu season hmasaa champion team kha hmuh turin an awm leh ta, tih hi a ni!

Minute 28-naah Jamie Vardy 'tak tak' a inlar a, English striker hian Marc Albrighton long pass chu um lutin an hmahruaina goal ni turin a khung. Minute 10-a liam a, Foxes bawkin goal an khung - James Milner ball tauh chhuah chu Drinkwater ke bulah tak a tla a, kum 26-a upa midfielder hian penalty area pawn aṭangin mawi takin a khung.

Chawlhlawk hman a nih hnuah pawh Leicester-in goal khung an tuipui laklawh a, Vardy chuan minute 60-naah an goal thumna a pet lut - Foxes-in Reds laka goal an khung hi kum 2017 league match-a goal an khung hmasak ber a ni. Vardy-a'n an goal thumna a khung aṭanga minute riat hnuah Coutinho chuan goal khat khung ve bawk mah se Foxes lehthal turin goal dang an khung thei tawh lo.

Leicester chak nan tlarhma lama Vardy-a'n fak a hlawh viau rualin goalkeeper Kasper Schmeichel sawi hmaih theih a ni lo. Danish keeper hian first half-ah Coutinho leh Emre Can pet goal tur nia lang ṭha takin a dang a, chawlhlawk hman a nih hnuah Adam Lallana beidawnna a thlensak bawk.

Reds an chuai
Liverpool-in nikum Decem­ber thleng kha chuan champion an sawi ngam a, tunah erawh season thara Champions League an khelh dawn leh dawn loh chu zawhna chhan harsa tak a ni ta.

Foxes khelmualah ni 16 chhung inkhel lo chungin an lut a, hahdam hle mah se Liverpool player-te an tha tho lo a, Spain-a training nei zo hlim team zingah hian Coutinho chiah chu player khel ṭha a ni.

Thla 12 liam taah khan Lei­cester hian Vardy goal hmang vekin Reds hi an lo hneh tawh a, table chung berah awmin pariatna Liverpool nen an inthlauhna chu point 16 a ni.

Klopp-a nauten Thawhṭanni zana Leicester an ngam loh leh chiah hian hmahruaitu Chelsea chu point 14 zetin an thlau leh ta bawk a, Foxes erawhin relegation zone chhuah­san nan an hmang thung.

Liverpool-in season ṭantir aṭanga an buaina an tlarhnung an la thawm ṭha lo tih hmuh turin a awm a, centre back a khelhtir Lucas Leiva a chi ai ṭhin hle! Hliam vanga inlan thei lo captain Jordan Henderson tel loin Reds hi midfield-ah an talbuai tih a lang bawk.

Eng nge an sawi?
Leicester manager lailawk Craig Shakespeare chuan, "Warm up kan neih lai aṭang tawh khan ka player-te khan theihtawp chhuah an tum tih kha an mitmeng aṭangin ka hmu thei a ni. Club tana heng player-te inpekna hi kei chuan engtiklaimahin ka ringhlel ngai lo. Sawiselna tam tak an tawk a, an rilru a na tih pawh ka hria. Mahse, chuvang tak chuan chak duhna thinlung an nei lehzual a, kan result chhe ṭhin avang khan mawh an phur tih an inhria a ni. Mahse, hei hi match khat chauh a ni a, kan chhunzawm zel a ngai ang," a ti.

Liverpool manager, German mi Jurgen Klopp chuan, "Hnehna chan loh chuan ṭawng dang hman hi ka harsat lehzual ṭhin a, thil sawi harsa ka ti ṭhin. Lei­cester kha an huaisen ta thut a ni hran lo a, kan tharum kan hmang thiam tawk lo. Tun hnaia an dinhmun avangin Leicester hian an theihna dik taka khelh chhuah an duh ang tih a chiang a, season hmasaa Leicester kha kan nihtir leh a, chu chu kan thiam loh a ni. Hetianga kan khelh chuan sawiselna pawh tawk tur kan ni a, hetiang taka kan khelh ṭhat kan chhunzawm thei lo hi a awmzia pawh ka hre lo," tiin a player-te chungah a lungawi lo hle.