Mumbai-in players pathum ko let
I League-a talbuai mek Mumbai FC chuan an players pathum Steven Dias, Pratik Chowdhary leh Allan Dias-te an chhuahtir zet hnuah fans hnen aṭanga an club thutlukna duh lohna thawm a rin em avangin senior players pathum hi kohkir leh an ni. Mumbaikars hi tun Inrinnia RG Stadium, Mualpuia Aizawl FC hmachhawn tur a ni.
Mumbai FC coach Santosh Kashyap chuan kar hmasa lawk khan players pathumte hi club training zawm lo turin a hriattir a, club-in an mamawh tawh loh thu an hrilh! Mahse, fans-in Mohun Bagan coach hlui thutlukna hi an duh lohna an lantir a, amah zawk chu bang turin an nawr hial!
Season hmasaa relegation zone aṭanga Salgaocar chhanhimtu coach erawh chuan thutlukna chu a siam a nih loh thu sawiin, "Engtiklai mahin players hi ka ban ngai lo a, tuna ka players pathumte chungchanga dem hlawh ber ka ni te hi a mak a ni. Ka player-te chu naupang angin ka enkawl ṭhin a, ka hau a, ka fuih a, ka ngaihtuah em em ṭhin. In lama ka fate ka kaihhruai ang chiahin ka kaihruai ṭhin a ni," a ti.
Player a nih laia freekick pet thiam vanga hriat hlawh coach chuan sawi chhunzawmin, "I fate chuan thil tihsual an neihin i zilh ṭhin a, i fa aṭangin i tui thlar ta tihna erawh a ni lo. An tihsual chu siamṭhat duhin i hruaikir mai ṭhin zawk a ni. Mumbai a kan buaina nen hian a inang chiah em tih erawh ka sawi thei lo," a ti a, thutluknaah a inrawlh loh thu a sawi.
March 4-a Aizawl FC hmachhawn turin Mumbai FC hian vawiin zing khan Mumbai khawpui chhuahsanin Mizoram an rawn pan a, he thu buatsaih lai hian Mizo tlangval Lalchhawnkima chu Aizawl hmachhawn tur squad-ah a tel leh tel loh kan hre hman lo.
Season hmasaa Aizawl FC defender Chawnkima hian season ṭantira Bengaluru an hmachhawn ṭumin a malpui vei lamah hliam a tuar a, hemi hnu hian inkhel a la hmachhawn leh lo. Amaherawhchu Champhai tlangval hian ni thum chhung club training a zawm leh tawh thu Vanglaini palai a hrilh.
Round 12 Fixtures
March 4, Inrinni
2:05 PM Aizawl FC Vs Mumbai FC
4:35 PM Shillong Lajong Vs East Bengal
7:05 PM Churchill Brothers SC Vs Mohun Bagan
March 5, Pathianni
4:35 PM Minerva Punjab Vs Bengaluru FC
7:05 PM Chennai City Vs DSK Shivajians
Team Dinhmun
# Team Pld W D L GF GA GD Pts
1 East Bengal 11 7 3 1 21 6 15 24
2 Aizawl FC 11 7 2 2 14 9 5 23
3 Mohun Bagan 9 6 3 0 15 4 11 21
4 Shillong Lajong 10 5 1 4 15 13 2 16
5 Bengaluru FC 10 3 4 3 15 11 4 13
6 Minerva Punjab 11 2 5 4 9 18 -9 11
7 DSK Shivajians 11 2 4 5 9 14 -5 10
8 Churchill Brothers 11 2 3 6 13 17 -4 9
9 Mumbai FC 11 2 3 6 6 14 -8 9
10 Chennai City 11 2 2 7 7 18 -11 8
AIZAWL FC VS MUMBAI FC
March 4, Inrinni - 2:05 PM
RG Stadium, Mualpui
Upper Gallery - Rs 200; Lower Gallery - Rs 100
TICKET LEI THEIHNA
1. Aizawl FC Merchandising Centre
2. Raw Digital, Near Vanglaini Office, Zarkawt
3. Stalwart, Opposite Mission Veng Bus Stand
4. Din Din Pharmacy, Khatla Kawn
5. Emmanuel Store, Near Greenwood Hospital, Bawngkawn
6. Carz Spa, Millenium Centre, Motor Silna
7. David Security Solution, Near Zote Bakery, Chanmari
8. HB Enterprise, Hero Cycle, Lower Zarkawt
9. RS Traders - Third Eye Solution, Bawngkawn, Durtlang Road
10. Hnamte Electrical Store, Mission Veng