India Squad-ah Mizo pali an tel Aizawl FC player pakhatmah an lang lo
AFC Asian Cup Qualifiers khel tura inbuatsaih India chuan probable squad-a puang a, players 31 koh chhin zingah Mizo pali an tel - I League-a pahnihna ni mek Aizawl FC player erawh tumah koh an ni lo.
Mizo palite hi Jeje Lalpekhlua, Daniel Lalhimpuia, Isaac Vanmalsawma leh Jerry Lalrinzuala-te an ni.
Indian Super League Emerging Player of the League nilai Jerry hi India squad-ah tel tura vawi khat koh a nihna a ni.
Mizo players langsar zingah beisei loh takin East Bengal captain Lalrindika Ralte chu koh a ni lo a, tun season I League match li bak la inlan lo East Bengal winger Jackichand Singh erawh koh a ni leh lawi si! Mizo club Aizawl FC-in I League-ah season ṭha tak an hmang chungin an players zingah India tana khel tura koh an awm lo bawk.
India hi AFC Asian Cup 2019 qualifiers-ah hian Group A-ah Kyrgyzstan, Myanmar leh Macau te nen an awm ho a, an match hmasa ber chu March 28 khian Yangon khawpuiah Myanmar nen an khel ang. March 22-ah Cambodia nen Phnom Penh khawpuiah friendly match an khel ang.
Mumbai khawpuia squad koh chhin ho training neihpui tur India coach Stephen Constantine chuan, "Mumbai khawpui boruak avangin he hmunah hian camp kan nei dawn a ni. Mumbai hi Yangon nen a boruak a inang a, boruak lum leh uap taka training kan lo neih lawk hian Myanmar-ah buai loin kan khelh theih phah dawn a ni," a ti.
Players a thlan dan sawiin, "I League leh ISL-a player-te khelh dan aṭangin kan en a, ka sawi fo ṭhin angin tu tan pawh kawngka hi chu a inhawng reng a ni. Mahse, chumi tur chuan players chuan kan mamawh min pe thei tur a ni a, squad-a koh tur players enthla hian thla engemawzat chu hun kan lo hmang tawh a ni," a ti.
India probables squad (31)
Goalkeepers: Subrata Paul (DSK Shivajians), Gurpreet Singh Sandhu (Stabaek FC), Amrinder Singh (Bengaluru FC), TP Rehenesh (East Bengal)
Defenders: Pritam Kotal, Anas Edathodika, Subhasish Bose (all Mohun Bagan), Nishu Kumar, Sandesh Jhingan (both Bengaluru FC), Arnab Kumar Mondal, Narayan Das (both East Bengal), Dhanapal Ganesh (Chennai City FC), Fulganco Cardozo (Churchill Brothers), Jerry Lalrinzuala (DSK Shivajians)
Midfielders: Jackichand Singh, Rowllin Borges, Mohammed Rafique (all East Bengal), Seityasen Singh, Milan Singh, Halicharan Narzary (all DSK Shivajians), Udanta Singh, Eugeneson Lyngdoh (both Bengaluru FC), Pronay Halder (Mohun Bagan), Anthony D'Souza (Churchill Brothers), Isaac Vanmalsawma (Shillong Lajong)
Forwards: Sunil Chhetri, CK Vineeth, Daniel Lalhlimpuia (all Bengaluru FC), Jeje Lalpekhlua (Mohun Bagan), Robin Singh (East Bengal), Sumeet Passi (DSK Shivajians).