Aizawl FC-in Under-18 in phuba an la

Aizawl FC-in I League Under 18-a an match hnuhnung berah Manipur club NEROCA chu 4-1 in an sawp a, Rest of India Zone Group B-ah pahnihna dinhmun ni phak mah se final round an lut pha lo - TATA Football Academy-in final round an lut.

Nimin khan JRD Stadium, Jam­shedpur-ah Group B match hnuhnung ber khelh a ni a, TATA Football Academy leh Pride Sports chu 1-1 in an inhnehtawk. TFA an chetsual avangin NEROCA-in final round lut turin beiseina an nei a, Mizo club lakah a thamral.

Aizawl FC-in an intawn hmasak ṭuma an hneh loh NEROCA lamah Lalruatpuia goal hnih bakah F. Lalremsanga leh Paul Ramfangzauva te hmangin goal li an khung a, Manipur club hian mualpho hliah khuh nan Ngangbam Nanao hmangin goal khat an chhanglet.