Manchester United ropuina chhi nung leh turin Zlatan Ibrahimovic leh Jose Mourinho

Kum 2013 khan Manchester United history-a manager ropui ber Sir Alex Ferguson-a'n manager hna a chawlhsan a, a kalsan hmunruak zau tak chu Scottish manager David Moyes-a'n a hnawh khat zo lo. United-in tawnhriat nei ṭha Louis van Gaal an lalut a, season hnih chhungin Dutch manager hian FA Cup chiah a lakpui a, nomawi a chawi zawh hnu lawkah ban a nih tur thu a hre zui a, ni hnih hnuah official-in an ban bawk.

United hian Sir Alex-a hun laia an ropuina neih let an duh a, Dutch manager Van Gaal-a kaihhruaina hnuaiah an beisei ram an thleng phak dawn loah an ngai tawh. An hmelma Manchester City lamin hma an la chak a, inelna zawng zawnga champion thei an nih mek laiin Manuel Pellegrini thlakna atan manager sulhnu ṭha ber zinga mi Bayern Munich duh lai Pep Guardiola an lakluh thu an nemnghet bawk. Hei vang hian FA Cup chawipuitu manager Van Gaal-a chungah pawh United hian ṭhat an chhuah thei tawh lo.

The Special One

Manchester United-in May 27, 2016-ah Jose Mourinho an lakluh thu an puang a, exe­cutive vice-chairman Ed Woodward chuan, "Jose hi sawi buai ngai loa coach ṭha ber a ni," tiin chhuang takin a sawi. Amaherawhchu a nihna takah chuan Mourinho hi England a zawm tirha 'The Special One' anga a inchhal hunlai ang kha a ni tawh lo a, Portuguese mana­ger hi Chelsea-in an ban avanga club enkawl lai nei lo a ni.

Mourinho hian Premier League-ah Chelsea champion pui nawn thei loin European Competition-a khel thei turin khawpin chet ṭhat pui lo mah se champion duhna erawh a la nei reng a, hmelhriat ṭha leh hu hang ringawt chu ṭhatpui tham a la ni. Portuguese manager hian tactic ringawt a champion pui thei lo tih a hrechiang a, December 2015-a Chelsea-in an ban hnu aṭangin a club enkawl theih tur Manchester United ngaihtuah chungin player a zawng ṭan tawh!

Portuguese manager Mou­rin­ho-a'n player naupang rual nomawi a chawipui theih loh tih a hria a, league sang pali aṭangin player pali a lalut. Bundesliga Player of the Season Henrikh Mkhitaryan, La Liga Team of the Season-a tel pha Eric Bailly, Serie A Team of the Year a tel pha leh assist ngah ber Paul Pogba bakah Ligue 1 Player of the Year Zlatan Ibrahimovic te a lalut a, United-in an ṭhatpui vek.

Mi bik Mourinho

Juventus aṭanga Pogba sawm chhuak turin mi bik nih a ngai a, sum a ngai bawk. Manchester United-in player ṭha lakluh nan sum an nei a, Mourinho hi mi bik chu a ni. Swede forward Ibrahimovic erawh sum a ngai lo a, Mou­rinho nen inkungkaihna ṭha an neih chu United a zawm theihna chhan a ni.

EFL Cup-ah United an cham­pion a, Mourinho nomawi chawi theihna chhan chu Ibrahi­movic a ni a, Portuguese manager hian Swede forward a mamawh tih hi season ṭantirh aṭangin a hmu lawk. Ibrahimovic hian tun season-ah match 38 khel tling tawhin goal 28 a khung tawh a, a goal khung en kanin Swede forward khelh zat thlir ila, Mourinho duhsakna a dawng tih a lang - kum 35-a upa forward hian amah aia naupang leh thahrui ngah zawk player tam tak aiin a khel tam zawk.

Season ṭantirh khan Mou­rinho kaihhruai United hian Community Shield an chawi a, hetiang inelna tenau chhiar tel miah loh hian Portuguese manager Mourinho hian nomawi lian tham 19 a chawi tawh. League Cup bik ringawt thlir pawhin Mourinho hian Chelsea vawi thum a champion pui tawh bawk avangin Sir Alex Ferguson leh Nottingham Forest boss ṭhin Brian Clough te record tlukpuiin vawi li a champion tawh.

Cham rih rawh Ibra

League Cup final-a Sou­thamp­ton lama goal hnih khungtu leh man of the match Ibrahimovic hian United-ah season khat chiah contract a ziak. Swede forward Zlatan chuan, "Mourinho-a'n min rawn bia a, ani nen hi chuan kan inkar a ṭha sa hrim hrim a, chuvangin United hi ka rawn zawm a ni," tiin a sawi.

Portuguese manager hian Ibrahimovic nena an thawhdun zel a beisei a, amaherawhchu Mourinho chuan, "Player hi contract ziak turin ka ṭah awh ngai lo. United ṭantute an inah kal se, zan khuain kawngka bulah an duh tih lantir nan va awm se," tiin Swede forward chelh turin supporter lam pawhin hna an neih thu fiamthu pahin a sawi.

Ibrahimovic chuan, "Thla hnih khelh tur a la awm a, thil awm dan kan en phawt a ṭul a ni. Mi ṭhenkhat chuan Champions League kan khelh phak loh chuan contract ka pawtsei lo ang tih tein an lo ziak a, ka contract-ah ngawng a nei lo," tiin thuchiang a la sawi duh lo.

Swede forward hi mi bik a ni tih chu a chiang a, nomawi 32 zet a chawi tawh. Ibrahimovic hian United-ah captain armband hreng lo mah se khelmual chhungah team khaipa a ni a, goal 26 zet khung tawhin amah hnaih bertu Juan Mata-a'n goal kua chiah a khung. Zlatan hian shot vawi 143 a nei tawh a, Pogba-a'n vawi 117 shot a nei ve bawk a, goal zawnah Swede forward hian vawi 65 petin Pogba-a'n vawi 39 a pet thung. Goal nawr kawngah Ibrahimovic hi United player zingah a chungnung a, player pawimawh a ni.

Record thlirin Mourinho hian Manchester United ropuina chhi nung leh turin theihna a nei a, amaherawhchu Portuguese manager hian amah ang bawka nomawi duha tuihal Ibrahimovic hi a mamawh zel ang. Tun season-ah United hian Premier League nomawi an chawi theih beiseiawm tawh lo mah se Europa League leh FA Cup champion thei tur zinga rinkai an ni a, tuna Mourinho hnuaia an thlen chinah lawm viau mah se season tawpah Community Shield leh League Cup chiah an kawl chuan an lungawi zan lo ang.