Gotze buai chhunzawm

FIFA World Cup-a Germany champion na goal awmchhun khungtu Mario Gotze chu a tihrawl na a dam hleithei lo a, hliam langsar tak ni si loin khelmual chhungah a inlan thei lo chhunzawm zel.

Kum 24-a upa Gotze hian nipui transfer lai khan Bayern Munich aṭang­in a club hlui Boru­ssia Dortmund a zawm leh a, a hliam vang hian Bundesliga match kuaah chiah inkhel bul a la ṭan. League match a khelh hnuhnung ber chu January thlaa Mainz nen 1-1 a an inhnehtawk ṭum kha a ni.

Germany international midfielder Gotze chuan, "Training ground-a ka kir leh theih ngeina turin mimalin tih theih a neih zawng zawng hi chu ka ti kim vek tawh," tiin dam a chak thu a sawi.

Dortmund sporting director Michael Zorc pawhin an player chung­chang sawiin, "Tihrawl na a neih leh avangin training a nei thei rih lo a, a natna hi endik niin a chawlh chen tur erawh a la chiang thei lo. A dam thuai theihnan duhsakna kan hlan a, kan club chu a lamah kan ṭang tlat a ni," a ti.

Dortmund hian tun season-ah beisei an phak lo a, Bundesliga table-ah pathumna niin hmahruaitu Bayern Munich an phak lohna chu point 13 a ni tawh - match 12 khelh hmabak an la nei.