Berlin mawitu Korbut-i'n Olympic gold medal a hralh!

Olga Korbut chuan Olympic gold medal a dawn ṭhenkhat a hralh! Soviet gymnast-in a medal a tihral chhan hi khawthlang thuthar thehdarh tute chuan sum lam harsatna vang niin an sawi a; Korbut sawi dan thung chuan a hun tawn ropui chu midangte tem ve phaka chhawp chhuah a duh vang niin a sawi thung.

'Darling of Munich' tia an sawi ṭhin Korbut hian medal pasarih chu Heritage Auctions-ah Online hmangin a hralh a, heng zingah hian 1972 Munich Olympics gold medal pahnih leh silver a tel a, a hralhna hi £147,000 (Rs 1,22,07,280.65) niin a manto ber chu team-in gold medal an lak £53,067.46 (Rs 44,05,170) man a ni.

Russia website pakhat Gazeta.ru tarlan danin Korbut chuan sum harsatna a tawk niin an sawi a, "A thiltih hian a rilṭamna a ti reh ang," tiin a dinhmun a chhiat thu an sawi a, an ram chhuahsana United States-a pemta infiammi chungchangah ṭawngkam an duhtui lo hle.

Kum 61-a upa Korbut-i'n a lawmman dawn a tihral zinga langsar tak pakhat chu 1972 BBC Sports Personality of the Year Award kha a ni. A tam ber chu Soviet medals niin sports magazine cover-a a hming a ziahna pawh a tel.

A vanglaia mite ngaihzawn rawn Korbut chuan, "Hei hi Olym­pic thil a ni a, khawvel pum tana chhawpchhuah hi ka duh a ni. Mipuite hian thawnthu ziah kawngah ṭangkaina an nei a, kumkhuaa hriatreng tawh tur an hnena hnutchhiah hi ka duh a ni," tiin a sawi ve thung.

Bul ṭanna

Korbut hi May 16, 1955 khan Grodno, Belarus-ah a piang a, kum riat chauha upa a nih laiin infiamna khawvel a luhchilh. Kum 9 a nihin 1964 Olympic medalist Elena Volchetskaya hnuai­ah training a nei ṭan der tawh.

Kum 1969 USSR champion­ship-ah khan a vawi khat nan inelna a hmachhawn ve a, hemi ṭum hian kum 15 hnuai lam inelnaah inlanin pangana a ni. He inelnaah hian a kum lehah inlan zuiin vault-ah goald medal a la, a hrisel loh bakah hliam a neih fo avangin 1972 Olympics hmalam kha chuan infiamna huangah a hmel a lan tam zui thei lo.

“Sparrow from Minsk”

Cold War lai a ni a, 1972 Summer Olympics chu Germany khawpui Munich-ah nghah a ni. Feet 4 leh inches 11 a sang Korbut chu USSR tan thlan a ni ve a, Belarus khawpui Minsk hming chawiin “Sparrow from Minsk” tiin a hming lem vuahsak a ni. Kha tih hun lai chuan Russia ram bik tia sawi tur a la awm lo a, Belarus hi USSR hnuaia awm a ni.

A pumrua a te a, a ṭhiante zinga enbik a hlawh. A tira mipuiin an hriat hran dan erawh inelna tawpah chuan a danglam tawh. Korbut hian gymnastics thiam chungchuang bik a nihzia lantirin Balance Beam, Floor Exercise leh Team-ah gold a la a, Uneven Bars-ah silver medal a la bawk - infiamna khawmpui lian a zawh meuh chuan 'Darling of Munich' nihna chu Korbut ta a ni chiang hle!

Kum 1976 Summer Olym­pics-a lo her chhuah khan Korbut hi mi tam takin a hmu chak a, khaw­velin nghakhlel takin Mon­treal a thlir ṭhup. World Championship-a gold pahnih latu hi Canada-ah a vanduai a, hliam a neih avangin beisei a phak lo. Mahse, team inelnaah gold an la tho a, mimal inelna Balance Beam-ah silver a la bawk.

Engtin zel...?

Grodno Pedagogical Institute aṭangin Korbut hi kum 1977 khan a graduate a, gymnastic a chawlhsan zui bawk. Zaithiam lar Leonid Bortkevich nen inneiin fa pakhat Richard an nei. Kum 1991-a USSR an kehdarh khan United States-ah an pem a, New Jersey-ah chengin hetah hian gymnastic zirtir hna a thawk.

International Gymnastics Hall of Fame-a hming lang hi tunah chuan Arizona-ah a cheng a, naupang a bik takin gym­nastics a zirtir ṭhin bakah a thusawi thiam a larpui hle. 2012 Summer Olympics-ah khan gymnastics inelna bik kha Twitter leh Facebook kaltlangin commentary a ti.

Nikum August thla khan Korbut hian Olympic medal a lak champha vawi 40-na lawmin, "Hetiang hun hi ka tawn phak ka ring lo a, a hluin a ropui ka ti hle," tiin a sawi; tunah erawh a ngaihhlut leh mite hriat a hlawhna gymnastic aṭanga medal a lak chu a hralh ta!