Bengaluru-in striker thar lalut
I League champion Bengaluru chuan Serbian striker Marjan Jugovic chu season tawp thleng atan an lalut. Kum 33-a upa striker hi tawnhriat ngah tak niin UEFA Europa League leh AFC Champions League-ah hial pawh lo inlan tawh ṭhin a ni.
Poland, Syria, Iceland leh Indonesia-a club hrang hrang tana lo khel tawh striker hian Bangalore club a zawm hma hian Lebanese club ṭha Al-Akhaa Al-Ahli Aley tan a khel a, match 31 inlanin goal 18 zet a khungsak. Bengaluru hian February thlatir khan Honduran striker Roby Norales chu second division club Ozone FC-ah chhuahtirin Jugovic hi a thlak nan an lalut.
Bengaluru coach Albert Roca chuan, "Marjan kan lakluh theih avangin ka lawm a, kan tlarhmaah hmasawnna hmuh tur a awm phah ngei ka beisei. Striker pasang tak, target man a ni a, tawnhriat a ngam hle bawk. Kan match khelh tawhah chance tam tak insiam chungin goal kan khung thei lo ṭhin a, kan buaina hi chinfel a nih ngei ka beisei," tiin a striker thar chu goal tam tak khung turin a beisei.
Jugovic pawhin club thar a neih avanga a hlim thu sawiin, "Indian club lian, Asia huap pawha hriat hlawh tak ka zawm thei hi ka lawm takzet. East Bengal nena kan inkhel kha a hmunah ka en a, khatiang taka fans nei ṭha club tan hian khelh ka châk tawh a ni," a ti a, March 5 tlaia Minerva Punjab an lenchilh hunah Serbian striker hi inlan tura beisei a ni.