Dubai-ah Federer chak nuamsa

Roger Federer chuan Australian Open nomawi a chawi hnua a match hma­sa ber atan Thawhṭanni zan khan Benoit Paire a hmachhawn a, Swiss tlangval Federer hian Dubai Championship first round-ah hian minute 54 chhung lekin 6-1, 6-3 in hnehna a chang.

Kum 35-a upa Federer hian nikum khan a khup na vangin Dubai Open hi a khel thei lo a, kumina a match hmasa berah hian a khingpuiin break point vawi thum hmu ve mah se a a hloh miah lo. Hei mai bakah hian a service aṭangin 70% vel zet point a hmu.

Grand Slam vawi 18 champion tawh Federer chuan, "Nikumah hliam vangin he hmunah hian ka inlan thei lo a, kuminah harsatna nei loa ka inkhel leh thei hi ka lawm hle. Paire khan break point a hmu thei a, ka inchhanhim hlauh - khingpuite na taka nawr dan kha ka chhawmnun a pawimawh dawn," tiin a sawi.

Dubai Open-ah hian Federer hi vawi sarih - 2003, 2004, 2005, 2007, 2012, 2014 leh 2015-ah te khan a lo champion tawh a, he ATP World Tour 500 event-ah hian nomawi chawi hnem ber a ni. French Open inbuatsaih nan Federer hian Dubai bakah Indian Wells leh Miami Open te khelh a tum bawk.

Inkhel dangah seeded palina Gael Monfils chuan Egypt tlangval Mohamed Safwat chu 6-4, 6-3 in a hneh a, Philipp Koh­l­schreiber pawhin seeded pariatna Gilles Muller 6-4, 7-6 (1) in a hneh. Roberto Bautista Agut chuan 6-1, 7-6 (4) in Karen Khacha­nov a hneh ve bawk.