La Liga Barca leh Real Madrid inlan dawn
Spanish La Liga champion lai Barcelona chuan zanin dar 12:00 hian Sporting Gijon an lo mikhual dawn a, Catalan club hi an chak a nih chuan league hmahruaitu an ni ang. Mahse, dar 2:00 inkhelah Real Madrid-in Las Palmas an hneh a nih chuan Zinedine Zidane a naute hi an hmun ngai table chung berah an lawn lehnghal ang.
Beisei nei Barca
Lionel Messi goal khung hmangin Barcelona hian an match hnuhnung berah Atletico Madrid 2-1 in an hneh hram a, Luis Enrique naute hian match 24 khelh aṭanga point 54 hmuin an nomawi kawl lai humhim theih an inbeisei chhunzawm zel.
Barca hi Champions League last 16-ah Paris St-Germain lakah 4-0 in an mualpho a, inkhel hmabak la nei mah se an hmabak hi a khirhkhan tawh. Second leg an khelh hmain league match pahnih an la khel dawn a, Sporting Gijon bakah March 5 khian Celta Vigo an hmachhawn leh ang.
Catalan club hian an league match hnuhnung paliah hnehna an chang vek a, an thiampuipa chu Messi a ni. Argentina captain hian tun season La Liga match 21 a khelh aṭangin goal 20 a khung tawh - Sporting Gijon lakah pawh Messi bawk hi Barca innghahna a ni leh dawn.
Barcelona forward Neymar chuan league nomawi humhim an tumna kawngah club dang chanchin an ngaihtuah loh thu a sawi. Brazil captain chuan, "Kan elpui te pawhin theihtawp chhuahin hmalam an pan zel a, anni ngaihtuah buai hman kan ni lo. Keini tan chuan kan club hmasawnna bak ngaihtuah hman a ni lo," tiin a sawi.
Tun season inelna hrang hranga goal 10 khung tawh Neymar chuan sawi chhunzawmin, "Player te hian tun hnaiah hma kan sawn ṭheuh a, kan ṭhat dan berin kan khel chhuak chho mek. League match khelh tur a la tam a, a pawimawh ber chu point thum hmuh zel a ni," a ti.
Real kutah nomawi?
Real Madrid defender Marcelo chuan league nomawi chu an kuta awm a nih tawh thu a sawi! Real hi match khata khel tlem zawk chungin Barcelona aiin point khatin an sang zawk a, league match khelh hmabak 15 an la nei.
Real Madrid hian an match hnuhnung bera Villarreal an hmachhawn ṭumin goal hnih an chhuah hmasak hnuah 3-2 in an lehthal leh thei a, Gareth Bale, Cristiano Ronaldo leh Alvaro Morata ten goal an khung. Kum 2012 hnua league nomawi la chawi lo Real-in champion an tum ngam hi a mak lo.
Marcelo chuan, "Barcelona hian hun harsa an tawng mek a, an tan thil a harsa ve tawh hle ang. Tunah hian hmahruaitu kan nih avangin kan inkhelh hmabak zawng zawnga hnehna kan chang vek a nih chuan nomawi chu kan chawi ang," tiin a sawi. Madrid captain Sergio Ramos chuan season hmasa ang bawkin kuminah season tawp dawn thlengin champion tur a la chian loh chhoh zel a rin thu a sawi ve bawk.
Villarreal an hneh ṭuma goal khat khungtu Bale chu minute 88-ah lakchhuah a ni a, Wales international hian hliam tenau a neih vang a ni. Khawvela player manto pahnihna Bale hi hliam vangin a buai reng a, nikum November thla hnua a vawi khat nan Villarreal lakah inkhel bul a ṭan ve leh chauh a ni.
Real Madrid manager Zidane chuan, "Bale kha an nghawk a, hliam na lutuk a nei lo," a ti. Tottenham winger hlui hi Las Palmas hmachhawn tura thlan zingah a tel leh ngei a rinawm hle.