Bulls hneh loh hnuah Cavs an tho
Cleveland Cavaliers-in Inrinni zingah Chicago Bulls an hneh lo a, NBA champion hian nimin zing khan regular season kal meka an vawi 41 chakna ni turin Milwaukee Bucks chu 102-95 in an hneh.
Cavs tan hian Kyrie Irving chuan court chhungah minute 36 hun a hman chhungin point 25 a score hman a, an team tana score hnem ber a ni. Bulls hmachhawn ve lo LeBron James chuan point 24 thawh vein anni pahnih hi an langsar fal hle. James hian assists vawi ruk a nei tel bawk.
Eastern Conference hmahruaitu Cavs tan bench aṭanga lut Kyle Korver leh Derrick Williams te hmuhhmaih theih an ni lo. Williams hian point 14 score bakah Korver-a'n 13 a nei thung.
Kum 32-a upa James hian NBA chanchinah assists vawi 7,294 a nei ta a, basketball inelna lian khel lai player zingah assists nei hnem pathumna a ni. American star chungah hian Andre Miller (8,524) leh Chris Paul (8,059) te an awm.
Cleveland coach Tyronn Lue chuan, "Tu team pawh an player ṭha ber tel lo chuan an ṭhat tur angin an ṭha thei bik lo. James a tel loh hi chuan keini pawhin beisei kan phak lo a, ani a awm hi chuan tu team pawh kan hneh thei," tiin NBA finals MVP James a dah sang hle.