Mohun Bagan ropuina Jeje AFC Cup khel turin Bagan inpet tling

Mizo tlangval Jeje Lal­pekhlua'n Club Valencia, Maldives lakah goal hnih khungin Mohun Bagan chu Thawhlehni zan khan AFC Cup playoff-ah hnehna a chanpui a; Federation Cup champion lai hi Asia ram club inelna sang ber dawttu khel turin an inpet tling.

Rabindra Sarobar Stadium, Kolkata khawpuia inkhelah Mohun Bagan hian 4-1 in hnehna an chang a, Maldives-ah 1-1 a an lo inhnehtawk tawh bawk avangin inkhel belhkhawmah Sanjoy Sen-a naute hian 5-2 in hnehna an chang.

AFC Cup group stage-ah Group E-ah awmin I League champion Bengaluru FC, Maldives champion Maziya S&RC leh Bangladesh Premier League champion Abahani Limited Dhaka-te nen an awmho ang.

JJ12 a inlar
AFC Cup playoff first leg-a players langsar chawlh hah­damtir zingah Jeje a tel a, Thawhlehni zanah erawh Mizo tlangval hi inkhel bul ṭantir niin goal khung tura Hnahthial tlangvalin hun a mamawh zat chu minute hnih chauh a ni.

Jeje hian Prabir Das corner aṭanga shot a neih chu Club Valencia midfielder Ahmed Usam-a'n a kutin a lo dang a, penalty a hlawh chhuak. Ama penalty hlawhchhuah pet zuiin goalkeeper Mo­hamed Faisal a bum chiang hle.

Minute 45-naah Balwant Singh-a ball cross chu Jeje-a'n tlu chungin lo tlawh lut mah se Mizo tlangval dan tumtu Hussain Nihan-a'n an lama a tihluh palh niah ngaiin match official lamin Jeje-a goal angin an pawm lo - own goal-ah an ngai.

AIFF player of the year Jeje hian minute 82-naah Prabir Das ball cross chu ṭha zetin a tauh lut. Kolkata club lamin an duhtawk mai lo, Sony Norde chuan hun tawp nan minute hnih chiah a awm tawh tihah chak nemnghehna goal a khung.

Club Valencia tan Nigerian striker Godfrey Omodu chuan Jeje-a goal khung inkarah goal khat khung ve bawk mah se 'goal mawi tak' a nihna bakin hlutna a nei lo.

Ropuina ramah Jeje
Jeje Lalpekhlua'n season hmasa khan Asia khawmualpui club inelnaah goal sarih khungin Indian player zinga season khata Asia huap inelnaa goal khung hnem ber a ni, Mizo tlangval Jeje-a hmabak chu Indian zinga a pumpuia goal khung hnem ber nih a ni.

Indian player zingah Bhai­chung Bhutia chuan Asia huap club inelnaah goal khung hnem berin East Bengal, JCT leh Mohun Bagan tan goal 14 ngawt a khung. Pahnihna Mohun Bagan legend Sisir Ghosh chuan goal 13 a khung bawk. Player pahnih hi an chawl tawh a, goal khung hnem pathumna Sunil Chhetri-a'n Churchill Brothers leh Bengaluru tan goal 11 a khung tawh.

Mizo tlangval Jeje-a'n goal riat khungtu East Bengal legend Debasish Roy lehpelin palinaah a invawrh chho a, Indian players zingah Asia huap inelnaa goal khung hnem ber nih ngei a tum thu Vanglaini palai a hrilh.

Mohun Bagan striker chuan, "Season khata Asia huap club inelnaa Indian player goal khung hnem ber ka ni tawh a, Pathian zara ka dam chuan a pumpuia goal khung hnem ber nih ngei pawh ka tum a ni," a ti.

Mimal aiah team
Hnahthial tlangval chuan, "AFC Cup kan khelh theih nana goal hnih khungtu ka ni hi ka lawm takzet. Inkhelh zawh thleng khan hattrick siamah ka inngai a, chu chu ka ṭhiante leh coach pawhin an ngaihdan a ni. Mahse, match official lamin own goal angin an lo record si a, kan chak avangin ka lawm tho e. Goal khunga chak loh ai chuan ka hming lang lo mah se chak ka duh zawk," tiin team tana khel ṭhin player a nih thu Vanglaini palai a hrilh.

Indian players zinga I League-a vawi hnih hattrick siam thei awm chhun Jeje hian tun season-ah league match riat khelin goal li a khung tawh a, I League lamah pawh a chet ṭhat a chhawm nun zel theih a in beisei thu a sawi. Jeje chuan, "Ka fitness pawhin ngai a awh chho leh tawh a, theihtawp chhuaha goal khung chhunzawm zel hi ka tum ber chu a ni," a ti a, rim taka thawh chhunzawm a tum.

Mizoram kal chak
Aizawl FC-in Mohun Bagan an mikhual hun tur a la hriat loh a, hetichung hian Mizo tlangval Jeje chuan mahni ram mipuite hma ngeia inkhelh thuai a chak tawh thu a sawi. Federation Cup season khata goal khung hnem ber ni thei striker chuan, "Professional footballer ka nih hnua ka chak ber chu Mizoram ngeia I League khelh a ni a, season hmasaah India tan inlan a ṭul avangin ka lokal thei lo. Pathian zarah hun ṭha neih tawh ngei ka inbeisei a, ka phur tawh takzet a ni," a ti.

Mizo tlangval chuan sawi chhunzawmin, "Mizoramah fans an tam ṭhin a, Mohun Bagan lama ka ṭhiante pawhin Mizo mipui hma ngeia inkhelh an châk tawh thu min hrilh fo a ni," tiin a sawi a, a phur tawh hle.