Kolasib club-in inelna thlengtu an hneh

MFA Cup 2017-ah Kolasib champion Project FC chuan Lunglei aiawh Bazar Veng FC chu 3-2 in an hneh a, nimin inkhel dangah Serchhip club Hmar Veng FC-in Siaha club FC College Vaih chu 6-1 zetin an sawp bawk.

Ṭhuamluaia Mualah Hmar Veng FC-in Sia­ha club chungah zah­ngaihna an lantir lo a, MPL-a tawnhriat nei tawh Laltlanthanga leh Lalremruata (Arapa) ten goal hnih ve ve khungin Lalhruaizela leh Lalnunthara ten goal khat ve ve an khung bawk. FC College Vaih tan Simeon-a'n goal khat a khung ve a, he goal hian result a nghawng phak loh bakah goal nga zet an chhuah avangin Siaha club hian knockout stage an paltlang a rinawm loh.

Chawhnu inkhelah Project FC tan F. Lal­nun­hlua leh Ricky Zonun­mawia ten first half-ah goal an khung a, inelna thlengtu Lunglei club Bazar Veng FC-in R Lalhmangaihtluanga leh Edmund Lalrindika te hmangin an siphurh an sut. Inelna thlengtu Project FC jersey no. 10 Andy Lalrinpuia'n Kolasib club tan chakna goal a khung.

Lunglei hian inelna an la thu tak a, result ṭha nei turin AIFF Academy-a awm an player-te an ziak lut nachungin Edmund leh V. Lalengzama te pawhin danglamna an thlen thei lo.

Zirtawpni khian Ṭhuamluaia Mualah Chapchar Kut hman a ni dawn a, hei vang hian fixtures pawh tihdanglam a ni. Vawiin hian in­khel pathum a awm dawn a, Group A match pa­hnih bakah nimina hnehna chang Hmar Veng leh Project FC an inhmachhawn ang.

Vawiin Inkhel Tur
Group A
10:00 AM Bethel FC Vs North Gate
12:00 PM Chhimveng FC Vs Mizoram Police
Group B
02:00PM Hmar Veng FC vs Project FC
Nimin Inkhel Results
Group B
FC College Vaih 1-6 Hmar Veng FC
COL : Simeon 57'
HMA : Laltlanthanga 2', 63'; Lalhruaizela 18'; Lalremruata 28', 5';
Lalnunthara 90+2'
Bazar Veng FC 2-3 Project FC
BAZ : R Lalhmangaihtluanga 47'; Edmund Lalrindika 82'
PRO : F. Lalnunhlua 7'; Ricky Zonunmawia 45+2' (P); Andy Lalrinpuia 84'