India Under 17-in coach thar nei
All India Football Federation (AIFF) chuan Nicolai Adam hmunruak luah turin Portugal U-21 coach hlui Luis Norton de Matos an lalut. Kum 63-a upa manager hian World Cup 2017 khel tura inbuatsaih mek India Under 17 team chu a enkawl dawn a ni.
Benfica B team boss hlui hian AIFF Advisory Committee leh Sports Authority of India (SAI) aiawhte chu nimin khan inkawmna a neihpui a, hemi hma hian SAI director general Injeti Srinivas leh AIFF president Praful Patel-te lo hmu tawh bawkin AIFF hian niminah khan thutlukna hi an siam.
AIFF president Praful Patel chuan, "Matos kan lalut thei hi kan lawm takzet a, naupang enkawl lama a tawnhriat neih ṭhat tak hi India U17 team-in kan chhawr theih ngei ka beisei a ni. World Cup ṭha tak neih kan duh a, Matos kaihhruaina hnuaiah kan nauten World Cup-ah inkhel hmuhnawm tak an chhawpchhuah kan beisei," a ti.
Player a nih laia Portugal tana vawi nga inlan tawh coach chuan, "AIFF thil tum hi a ropui ka ti a, U17 World Cup hian India ram football hmasawnna kawngah nasa takin a pui dawn a ni. Player-ten ram tana thil ropui ti tur chuan mahni inrintawkna an neih a ṭul dawn a ni," tiin thawhhona ṭha an mamawh tur thu a sawi.
Sporting Lisbon-a director of football lo ni tawh Matos hian rawlthar chher lamah a hming a chher hle a, a players chherchhuah zingah Benfica defender Victor Lindelof, AS Monaco midfielder Bernardo Silva, Bayern Munich midfielder Renato Sanches leh Paris Saint Germain winger Goncalo Guedes te chu hming langsar an ni.