Hart-a hmalam hun Season tawpah chiang dawn

Manchester City manager Pep Guardiola chuan season tawpah chauh Joe Hart-a hmalam hun a tihchian tur thu a sawi. England goalkeeper hi Serie A club Torino-ah loan-in a chhuak mek a, rinlawk dan chuan season tawp rualin City hi a chhuahsan rin a ni.

Spanish manager Pep Guar­diola chuan, "Hart-a chung­chang hi season tawpah kan ngaihtuah ang," tiin thutlukna siam a hman hmawh lo. Hart hian Torino tan Serie A-ah clean sheet vawi nga a nei tawh a, Premier League-a City clean sheet aiin pakhatin a tlem. English keeper Hart hian Premier League leh European club ṭha ten an duh a, City-in an hnawl nawn a nih pawhin club khelhna turah a buai lo ang.

Barcelona leh Bayern manager hlui Pep hian a keeper neih lai Willy Caballero leh Claudio Bravo ah a lungawi tawka ngaih a ni. Chutihrualin kum 33-a upa Bravo hian nikum August thlaa Barcelona aṭanga pound maktaduai 15.4-a City a zawm hnuah sawisel a hlawh. Champions League last 16-a Monaco an hmachhawn ṭum pawhin Bravo aiah hian kum 35-a upa Caballero chu rin zawk a ni.

Hart buaina hi khelhna hmun a chang loh vang a ni a, season tawpah pawh kum hnih dang contract a la nei ang. English keeper bakah season tawp ruala contract tawp dawn vanga hmalam chiang lo player an awm bawk.

City manager Guardiola chuan, "Player panga paruk vel season tawp ruala contract tawp tur an awm a, thil awm dan erawh an hrethiam. Tlang taka sawi chuan kan tan pawh contract ziak thei an nih avangin hlauhthawn tur a awm. Club danga an ziak a nih chuan kan pawm mai a ṭul dawn a ni," tiin a sawi a, contract tawp mai tur player-te chhuak pawh nise pawi an ti loah a ngaih theih.

Manchester City keeper Caballero bakah Yaya Toure leh Bacary Sagna te chu season tawp ruala contract tawp tur zinga mi an ni. Nizan khan FA Cup fifth round replay-ah City hian Championship club Huddersfield chu Etihad Stadium-ah an mikhual a, result kan hre hman lo.