Chinese Super League Thlasik transfer-ah sum an seng hnem
Chinese Super League club thlasik transfer chu Thawhlehni khan khar a ni a, Chinese club-ten players lakluh nana an sum sen zat chu pound maktaduai 331 niin sum seng hnem ṭhang Premier League club aiin an seng hnem zawk. English division sang ber club 20-ten January-a players lakluh nana an sum sen zat chu pound maktaduai 215 a ni a, CSL sum sen zat hi pound maktaduai 116 zetin an phak lo.
Chelsea midfielder hlui Oscar chu player manto ber a ni a, Shanghai SIPG chuan Brazil international lakluh nan hian pound maktaduai 60 an theh chhuak. Shanghai Shenhua-in Carlos Tevez lakluh nana an sum sen zawng zawng chu pound maktaduai 40 nia sawi a ni bawk a, players pahnih hi Chinese Football Association-in foreign players lakluh theih zat a bituk hmaa lakluh an ni. CSL club-te hian nikum thlasik transfer-a an sum sen zat chu pound maktaduai 36-in an khum.
Players langsar
Kum 25 leka upa Oscar-a'n Chelsea-a a boss hlui Andre Villas-Boas zawm tura CSL a pan thu puan a nih hnu lawkah Chinese club dang an nghing ve nghal a, players ṭha zawk lakluh tumin sum an vawm hnem hle. Season hmasaa league table hnuai lam aṭanga chhiara pangana Changchun Yatai meuh pawhin sum an ngahzia pholangin Watford striker Odion Ighalo an lalut a, an sum sen zat chu pound maktaduai 20 a ni.
Everton-in lakluh tuma an hellai Belgium midfielder Axel Witsel chuan Premier League pan aiin sum tamna CSL pan a thlang a, Zenit St Petersburg a-
ṭanga Tianjin Quanjian pantu hian kum khatah pound maktaduai 15.3-a hlawh nia tarlan a ni. China ram president Xi Jinping-a'n kum khatah £16,000 a hlawh a, a kum khat hlawh zat let 20 pawhin Carlos Tevez-a kar khat hlawh a la pha lo!
China thlasik transfer in hawn chhung hi Europe aiin ni 28 zetin a rei zawk a, thlasik transfer bazar ringawta an sum sen zat hi La Liga club ten January-February transfer-a sum an sen aiin a let 16-in a sang zawk a, Spain, Italy, Germany leh France a club zawng zawng ten thlasik transfer-a sum an sen zat belhkhawm ai pawhin a tam.
Sum sen venna
Chinese Super League thlasik transfer-a sum sen zat hi kum 2013 hnu lamah chuan a pung thur thur a ni ber. Chinese club hian kum 2013 thlasik lai khan players lakluh nana an insen zat chu pound maktaduai 25 a ni. Kum 2014-ah pound maktaduai 58-ah a kai a, kum 2015-ah 103-in a kaisang. Kum 2016 a herchhuah meuh chuan Chinese club ten thlasik transfer laia players lakluh nan pound maktaduai 295 dawrh an hmang tawh a, 2017-ah chuan pound maktaduai 331 hial a kai ta.
Chinese FA chuan CSL club ten foreign player a sum an sen uchuak lutuk ven nan dan thar an siam a, he dan thar hnuaiah hian club tinin foreigner panga bak neih a thiang lo a, chung zinga pakhat chu Asian player a nih ngei a ṭul a, squad-ah phei chuan foreigner pathum bak awm a thiang lo.
Enge a nghawng?
Chinese FA-in dan thar a duan avangin Chinese club ten an duh angin sum an seng huai ngam tawh lo a, Europe club-te tan thawk huaina tham a ni. Tianjin Quanjian chairman Shu Yuhui chuan Chinese FA dan thar avang hian Chelsea striker Diego Costa, PSG forward Edinson Cavani, Monaco rinrawl Radamel Falcao leh Benfica forward Raul Jimenez te inbiakna an neihpui tawh chu an chawlhsan thu a sawi.
Manchester United striker Wayne Rooney pawh CSL nen hian sawi zawm hman a ni a, English striker-in China a pan loh chhan hi Old Trafford-a cham chhunzawm zel a duh vang ai mah chuan CSL dan thar avanga Chinese club liante an insum vang nia ngaih a ni. Hetihrual hian season ruk chhung a zawna champion tawh, Luiz Felipe Scolari enkawl Guangzhou Evergrande chuan Chinese FA dan thar avang hian kum 2020-ah chuan Chinese players hlang hmanga CSL khelh an tum thu an puang!