Nadal leh Djokovic an tlang

Mexican Open khelh mekah Rafael Nadal leh Novak Djokovic ten Thawhlehni zan khan an match hmasa ber an khel a, harsatna tawk loin second round an lut.

Grand Slam vawi 14 champion tawh Nadal-a'n amah ang thoa ban vei lam hmang thiam Mischa Zverev chu darkar khat leh minute 16 chhungin 6-4, 6-3 in a hneh. Spain tlangval Nadal hian winners vawi 28 a nei a, a khingpui aiin vawi 15 ngawtin a nei hnem zawk.

January thla khan Brisbane international-ah Nadal hian German star hi a lo hneh tawh bawk a, kumina an intawn vawi hnihnaah pawh hian a service hloh miah loin a tlang a, vawi hnih a champion tawhna hmuna nomawi chawi thei turin bul a ṭan ṭha hle - second round-ah Paolo Lorenzi a hmachhawn leh ang.

ATP World Tour 500 event inkhel dang­ah world number 2 Djo­kovic chuan fiahna a hmachhawn nghal a, darkar khat leh a chanve an inkhelh hnuah Martin Klizan chu 6-3, 7-6(4) in a hneh hram.

January 16 khan Djo­kovic hi Australian Open second round-ah Denis Istomin hneh loin a tla a, hemi hnua tournament a khelh lehna hmasa berah ATP World Tour title panga la tawh Klizan lakah duhthusama ṭhain a la khel chhuak lo.

Kum 29-a upa Djo­kovic hian second round-ah chuan Juan Martin del Potro a hmachhawn ang, Grand Slam vawi khat champion tawh Del Potro hian nimin khan Frances Tiafoe chu 6-4, 3-6, 7-6 in a hneh. Argentine tlangval Del Potro hian nikum Rio Olympic first round-ah Djokovic hi a lo hneh tawh a, Serbian star tan fimkhur a ngai hle ang.

US Open champion hlui Marin Cilic chuan Mexico-ah a vawi khat nan hnehna a chang ve ta, Croatian tlangval hi nikum khan inlan ve mah se a match hmasa berah a chak lo. Kuminah erawh Alexandr Dolgopolov lak­ah aces vawi 14 siamin 6-3, 4-6, 6-0 in hnehna a chang.