Inelna a thianghlim tawk lo - Phelps

Olympic chanchina infiammi hlawhtling ber Michael Phelps chuan khawvel huapa inelna a hma­chhawn ve tawhah thil dik lo a awm fo thu leh, dan leh hrai kenkawh nasat leh zual a ṭul a tih thu a sawi.

Kum 31-a upa Phelps chuan, "Khawvela huap inelna ka hmachhawn hian midang zawng zawng chu an dik fihlim vek hi ka ring ngai lo. Tui hleuh inelna ka hmachhawn

ṭhenkhatah khan thil dik lo ti ka hmu fo a, a ṭhen chu man chhuah an ni a, a ṭhen erawh man an ni lem lo," tiin a sawi.

Olympic gold medal 23 la tawhtu Phelps chuan sawi chhunzawmin, "Kei leh midang zawng zawng endik vek chu thil harsa a nih bakah hun a duh rei dawn a, chutih rualin tuna kan kal dan aia ṭha leh dik zawk hi chu neih a ṭul," a ti.

Tun hnaiah infiammite zingah dan bawhchhia man an tam a, a bik takin Russia sorkar an mualpho hle. US sorkar chuan in­fiam­­miten damdawi hman phal loh an hmang nge hmang lo tih endiktu World Anti-Doping Agen­cy (WADA) chu sum hmang­in a ṭanpui dawn a ni.