Best FIFA Football Awards Nominee an puang; Lewy a langsar

Football khawvela mimal chawimawina ngaihhlut hlawh ber tih ngam Ballon d'Or chu Covid-19 vangin sem dawn lo mah se Best FIFA Football Awards erawh sem a ni dawn.

FIFA chuan July 20, 2019 - October 7, 2020  inkara footballer ṭha ber thlanna neih tura nominee hming 11 chu nimin khan a puang chhuak a, Bayern Munich striker Robert Lewandowski hming a langsar hle. 

Lionel Messi leh Cristiano Ronaldo hming pawh a la lang a, club mal anga player thawh hnem ber erawh Liverpool an ni. Premier League champion hian player pali an thawh. 

Reds player-te hi Virgil van Dijk, Mohamed Salah, Sadio Mane leh Thiago Alcântara a ni a, Spanish playmaker Thiago lan chhan erawh season hmasaa Bayern tana a khelh ṭhat vang a ni. 

Bayern-in treble nomawi an chawi nana tha thawhhlawk bera chhal ngam chu Lewy-a ni. Polish striker hian season hman zawh takah khan Bayern tan match 47 khelin goal 55 ngawt a khung a, assist vawi 10 a nei - chawimawina a dawn mai a rinawm hle. 

Treble champion team aṭangin Liverpool midfielder ni ta Alcântara hming lang mah se Lewy ang emin a langsar lo a, Ronaldo leh Messi-te tan treble nomawi meuh chawitu Lewy khum hi thil harsa tak a nih a rinawm.

Paris Saint-Germain-in Neymar leh Kylian Mbappe an thawh a, Real Madrid aṭangin Sergio Ramos hming a lang a, Liverpool player pali karah Premier League aṭangin Manchester City midfielder Kevin de Bruyne hming a lang ve bawk.

Best FIFA Football Awards mimal lawmman dawng tur hi FIFA hnuaia national team coach, captain leh ram khat aiawh journalist pakhat ṭheuhin an thlang dawn a, FIFA.com-ah fans tan December 9, zing dar 4:29 thleng vote thlak theih a ni bawk. 

Goal khung mawi ber chawimawina FIFA Puskás Award pawh sem a ni dawn a, goalkeeper leh coach ṭha ber thlan a ni bawk ang a, heng mimal chawimawina hi hmeichhe football lamah thlan ve vek tur a ni dawn bawk a ni - FIFA FIFPro Men's World11 thlan a ni leh bawk ang.

Thiago Alcântara (Spain / FC Bayern/ Liverpool FC)

Cristiano Ronaldo (Portugal / Juventus FC)

Kevin De Bruyne (Belgium / Manchester City FC)

Robert Lewandowski (Poland / FC Bayern)

Sadio Mané (Senegal / Liverpool FC)

Kylian Mbappé (France / Paris Saint-Germain)

Lionel Messi (Argentina / FC Barcelona)

Neymar (Brazil / Paris Saint-Germain)

Sergio Ramos (Spain / Real Madrid CF)

Mohamed Salah (Egypt / Liverpool FC )

Virgil van Dijk (Netherlands / Liverpool FC)

Alisson Becker (Brazil / Liverpool FC)

Thibaut Courtois (Belgium / Real Madrid CF)

Keylor Navas (Costa Rica / Paris Saint-Germain)

Manuel Neuer (Germany / FC Bayern)

Jan Oblak (Slovenia / Atlético de Madrid)

Marc-André ter Stegen (Germany / FC Barcelona)

Marcelo Bielsa (Argentina / Leeds United FC)

Hans-Dieter Flick (Germany / FC Bayern)

Jürgen Klopp (Germany / Liverpool FC)

Julen Lopetegui (Spain / Sevilla FC)

Zinedine Zidane (France / Real Madrid CF)