Vendee aṭangin Tour de France

Khawvel huapa cycle intlan­siakna ngaihhlut 2018 Tour de France bul ṭanna hmun (Grand Depart) atan France rama khaw­thlanglama awm Vendee chu thlan a ni. First round hi June 30-ah Noirmoutier-en-l'lle (Vendee) aṭangin tlan ṭan a ni dawn a, kum 2011-a an lo tih tawh dan angin Passage du Gois an paltlang ang.

Passage du Gois-ah hian ni khatah vawi hnih tui a len ṭhin avangin kawng a nal a, inelnaa danglamna thlen theitu a ni. Tour de France tlan kawngah kum 1999 pawh khan hman a ni tawh a, champion tura rinkai Alex Zulle chuan inelna pumpuiah Lance Armstrong chu Passage du Gois-a a tlan ṭhat tawk loh vangin minute sarihin a phak loh phah a ni.

Tour de France bul ṭanna hi France ram chhungah chauh neih a ni lo a, inelna a darh zau theih nan kum 1954 aṭang khan ram dangah pawh neih ṭhin a ni. Kumin bikah hian Grand Depart chu Germany rama khawpui pakhat Dusseldorf-ah neih a ni dawn a, July 1-ah 2017 Tour de France hi ṭan a ni ang. Europe khawpui Edinburgh, Manchester leh German khaw ṭhen­khat enkanin London chu kumin Grand Depart thleng tur hian thlan an ni zet a, mah se contract an ziah dawn hnaiah Transport for London (TFL) chuan an inhnuhdawh thu an sawi a, Dus­seldorf thlan leh hnuhnawh a ni.