Mapuia Cricket League A hun a thleng dawn ta

Mizoram cricket-a inelna ngaihven leh ngaihhlut hlawh bera chhal ngam Mapuia Cricket League chu Inrinni hian khelh ṭan a ni dawn a, Cricket Association of Mizoram leh LPS ṭangkawpin an buatsaih inelna hi Suaka Memorial Cricket Ground-ah neih tur niin ni khatah match hnih zel a awm ang a, March 20-ah final khelh a ni ang.

A kalphung

MCL khel tur hian 1st divi­sion club-te inelna Mahuma Memorial Cricket Tournament table-a palina chin an tling ṭhin a, Zarkawt Lords chu inelna hming tumtu Mapuia khelh ṭhinna club an nih avangin tling chiangsa an ni. Zarkawt Lords hian 1st division-ah palina dinhmun an luah phak chuan an hmun ruak hi sum hmangin lilam a ni a, a chhang huai berin an chang ṭhin. Kuminah slot khat ruak awm mah se chhangtu an awm loh avangin team panga an inel dawn.

Mizoram cricket-a league ngaih­ven hlawhah hian team zawng zawng an intum kual vek ang a, a sang paliin qualifier leh eliminator an khel dawn. Inkhel pakhat zawkah table hmahruaitu leh pahnihna an intum ang a, a chak zawkin final lutin a chak lo zawk pawn hun ṭha dang an la nei dawn tho. Table-a pathumna leh palina chu eliminator round-ah an inhmachhawn ang a, heta chak zawk hian qualifier 2-ah pakhatna leh pahnihna inkhela chak lo zawk tum lehin a chak zawkin final an lut ang.

Inlan tur

Lawmman atana cheng nuai thum (Rs 3,00,000/-) sen ralna tur inelnaah hian Armed Veng CC, Chanmarians CC, Chhinga Veng CC, Kulikawn CC leh Zarkawt Lords CC te an inlan dawn. Inlan tur zingah Chanmarians hi nikum champion an ni a, Kulikawn hi 2013 leh 2014 champion niin 2015 champion Ramhlun Venglaiin 1st division inelnaah palina dinhmun an luah phak loh avangin an inlan dawn lo. Kumin inelna hi a ṭum ngana tur a ni.

Indian Premier League kal­phungin players lilamna neih ṭhin a ni a, tun season atana players lilamna hi February 14 zan khan neih a ni. Zarkawt Lords chuan MCL chanchina player manto ber ni turin Ramhlun Venglai CC batsman K. Vanlalruata chu Rs 46,000-in an lei. MCL club ten kumin inelna atana players lakluh nana an sum sen zat belh­khawm hi Rs. 2,13,100 a tling.

MCL Fixtures
LEAGUE ROUND
March 4, Inrinni
09:30 AM Chanmarians CC vs Chhinga Veng CC
12:30 PM Kulikawn CC vs Armed Veng CC
March 6, 2017 Thawhṭanni
09:30 AM Zarkawt Lords CC vs Chhinga Veng CC
12:30 PM Armed Veng CC vs Chanmarians CC
March 8, Nilaini
09:30 AM Chhinga Veng CC vs Kulikawn CC
12:30 PM Chanmarians CC vs Zarkawt Lords CC
March 11, Inrinni
09:30 AM Zarkawt Lords CC vs Kulikawn CC
12:30 PM Chhinga Veng CC vs Armed Veng CC
March 13, Thawhṭanni
09:30 AM Zarkawt Lords CC vs Armed Veng CC
12:30 PM Chanmarians CC vs Kulikawn CC
QUALIFIER 1
March 15, Nilaini
09:30 AM 1st Postion vs 2nd Postion
ELIMINATOR ROUND
March 15, Nilaini
12:30 PM 3rd Postion vs 4th Postion
QUALIFIER 2
March 18, Inrinni
10:30 AM Win of Eliminator vs Loser of QF1
FINAL
March 20, Thawhṭanni
10:30 AM Win of QF1 vs Win of QF2