La Liga aia entu ngah Championship
Lionel Messi, Cristiano Ronaldo leh player ṭha rual awm khawmna La Liga aiin Championship inkhelin thlirtu an ngah zawk. English football-a league sang ber dawttu Championship hian thlirtu ngah lamah Premier League leh Bundesliga chiah a tluk lo.
England-a league sang ber dawttu Championship hian 2016-17 season khelh tawh chinah thlirtu maktaduai 7.9 a nei thei a, an chunga awm Premier League (9.2m) phak lohna tam deuh mah se Bundesliga (8m) a phak lohna erawh a tam lua tawh lo. La Liga (6.6m), Serie A (5.6m) leh Ligue 1 (5.5m) te chuan entu ngah lamah Championship club hi an pha lo a ni.
Thla thum khelh hmabak la awmah Championship lamah nomawi inchuh boruak a sang lehzual a, club pathum Brighton, Newcastle leh Huddersfield te chu champion thei vek an la ni. League table-a a sang pahnihin season thara Premier League khel turin an tling dawn a, pathumna aṭanga parukna ten playoff hmangin hmunruak pakhat an inchuh bawk ang.
League-a hmahruai mektu Newcastle United chuan chawhrualin match tinah entu 51,062 an nei pha ziah a, club 24 zinga pakuain chawhrualin entu 20,000 chuang an nei ziah bawk. November thlaa Leeds United leh Newcastle inkhelh ṭum khan Sky Sports kaltlanga inkhel entu chu 826,000 a ni a, Champions League-a Bayern Munich-in Arsenal an sawp lai BT Sport aṭanga entu 584,000 aiin entu 242,000 zetin an tam zawk.
Newcastle (97.4%) leh Norwich (96.1%) te chuan inkhel apiangin 90% chuang ticket an hralh chhuak ziah a, Championship lam hian ngaihven a hlawh tih hi an ticket hralh dan aṭang pawhin a chiang a ni.
Championship club zinga chawhruala entu 20,000 aia nei tam te
Club Entu
Newcastle 51,062
Aston Villa 32,685
Derby 29,251
Brighton 27,400
Sheffield Wednesday 26,836
Leeds United 26,276
Norwich 26,188
Wolves 22,019
Huddersfield 20,165