Goal 17 khung tawh player pathum Premier League top scorer tur rin thiam a harsa

EFL Cup final-ah Zlatan Ibrahimovic-a'n goal hnih khungin Manchester United a champion pui a, Premier League lamah erawh Swede forward hian goal 15 khungin goal khung tam lamah player pali a tluk lo. Tottenham Hotspur forward Harry Kane chuan Stoke City lamah hattrick siamin goal 17 a khung tawh a, Everton forward Romelu Lukaku leh Arsenal forward Alexis Sanchez te nen an khung zat a inang. League hmahruaitu Chelsea striker Diego Costa pawhin goal 16 a khung tawh bawk.

Season khat aia tam

Kum 23-a upa Harry Kane hi 2014-15 season aṭangin Tottenham player pawimawh a ni ṭan a, goal 21 a khung. Hemi hma season-ah pawh London club tan Kane hi vawi 10 inlanin goal thum a khung tawh bawk.

English striker Kane hi vanneih thilthua che ṭha ve hluai tiha sawi a ni a, amaherawhchu goal hmangin amah seltute a chhang let. Spurs forward hian season liam ta khan match zawng zawngah inkhel bul ṭan vekin goal 25 a khung a, golden boot a dawng. Season hnih chhung chu Kane hian goal 20 a khung tling ve ve tihna a ni.

Tun season-ah Kane hian match 21 inkhel bul a ṭan a, goal 17 a khung der tawh. Inelna dang chhiar tel phei chuan English forward hian tun season-ah goal 22 a khung tawh a, inhliamin a tlak buak loh chuan goal tam zawk aia tam a la khung ang.

Record thar

Arsenal forward Alexis Sanchez-a'n tun season league-ah goal 17 a khung tawh a, Premier League-a a khung tam ber season a ni. Chilean forward hian season liam ta khan goal 13 a khung a, England-a a hun hmasak ber season-ah goal 16 a khung bawk.

Goal 17 khungtu zinga mi Everton forward Romelu Lukaku-a'n league-ah goal 20 a la khung tling ngai lo a, chutihrualin Premier League-a season li a hman tawhah goal 10 a la khung tling vek. Season liam ta khan Belgian forward hian goal 18 a khung a, harsatna a tawk a nih loh chuan Lukaku hian ama record siam sa hi a khum ang.

Costa leh Ibra

Goal khung theih vanga khawvel hriat hlawh a nih chuan hming pathum tarlan tawh aiin palina dinhmun hauh mek Diego Costa leh pangana Zlatan Ibrahimovic an lar zawk.

Chelsea forward Costa hian Premier League-a a inlan hmasak berah goal 20 a khung a, London club a champion pui nghal. Khelmual chhunga Spain international forward inlan zat hi vawi 26 chauh a ni a, a khelh zat nena chhut chuan a khung hnem hle. Season liam ta khan Chelsea an che ṭha tawk lo a, chutichung chuan Costa hian match 28-ah goal 12 a khung.

Tun season-ah Chelsea tan Costa a che ṭha leh tawh a, match 24-a khelh aṭangin goal 16 a khung tling der tawh. Manchester United striker Ibrahimovic-a'n hrem vanga Arsenal a hmachhawn thei lo tih chu a la inlan vek a, match 24 a khelh tawh aṭangin goal 15 a khung tawh. Swede forward hi kum 35-a upa a ni tawh a, October 3-ah kum 36 tling tawh dawn mah se goal khung a la bansan lo a, champion duhin a la tuihal reng bawk.

Striker ṭha dang

Sunderland forward Jer­maine Defoe-a'n goal 14 a khung tling tawh a, top scorer ni tur em chuan a kum a upat tawh bakah a khelhna club-in a zir tawk lo niin a lang. Manchester City-in Sergio Aguero an kawl a, Argentine forward hian goal 11 a khung tawh mah se City forward tan kumin hi kum ṭha a ni lo.

Spurs midfielder Dele Alli-a'n goal 12 a khung tawh a, Liverpool forward Sadio Mane-a'n goal 11 khung tawhin Chelsea winger Eden Hazard-a'n goal 10 a khung tawh. Heng player-te erawh inkhela danglam thlen theitu an ni nachungin top scorer ni thei zingah chuan chhiar tel loh a finthlak zawk ang.