Juventus-in Napoli lehthal

Coppa Italia champion lai Juventus chuan goal khat an phurh zet hnuah an mikhual Napoli 3-1 in an lehthal a, March 7 zanah second leg chu Naples-ah khelh leh a ni dawn.

Thawhlehni zan first leg inkhelah Napoli tan Jose Callejon chuan goal khat a khung a, Turin club hian Paulo Dybala penalty vawi hnih chhuih luh leh Gonzalo Higuain goal khat hmangin an chhang let.

Turin-ah beisei loh danin team pahnih an inrem. Juve manager Massimiliano Allegri chuan 3-4-1-2 formation hmangin striker pahnih Mario Mandzukic leh Gonzalo Higuain te hnungah Paulo Dybala a dah a, goal khung a tum tih a chiang.

Napoli lamin Allan leh Lorenzo Tonelli te hliam vanga an chhawr theih loh bakah Elseid Hysaj chu hrem a ni. Nikum October thla hnua a vawi khat nan forward Arkadiusz Milik chuan inkhel bul a ṭan thung. Ajax aṭanga Italian club zawmtu Polish forward Milik hian a hliam dam hnuah beisei angin a khel chhuak nghal lo.

Inkhel chu

Inkhel ṭan aṭanga rei lote hnuah Juve hian hun ṭha vawi hnih an nei nghal. Leonardo Bonucci-a long ball dawngtu Dybala chuan keeper Pepe Reina a paltlang zo lo a, corner aṭanga ball lo kal chu Mandzukic-a'n a tauh over chiah bawk.

Napoli lamin Lorenzo Insigne leh Marko Rog te hmangin Juve keeper Murara Neto tan hna an siamsak a, Marek Hamsik leh Jose Callejon ten goal bar hrulah an hun ṭha an khawhral ve ve bawk.

Minute 36-naah Insigne leh Milik te thawhrah sengin Calle­jon chuan goal hmahruai a khung a, Napoli-in an club chanchina a vawi khat nan Juventus Stadium-ah hma an hruai a, fans thawm a ring hle.

Liverpool keeper hlui Reina-a'n Mandzukic a goal khung tur a dansak hnuah Kalidou Koulibaly chuan penalty a chawi a, Dybala-a'n ama penalty hlawhchhuah chu an siphurh sut nan a hmang.

Khawvela player manto pa­thum­na Higuain-a'n angle zim tak aṭangin an hmahruaina goal a khung zui a. Season hmasa league match 35 a khelh aṭanga goal 36 khung thei Higuain hian a club hlui lakah a manto zia a pholang chiang hle.

Miralem Pjanic-a'n Raul Albiol a tihtluk vanga Napoli-in penalty an beisei pek an nih loh hnuah Reina chuan Cuadrado laka a foul vangin penalty a chawi a, Dybala bawkin a khung. Argentine forward hian tun season-ah a club tan inelna hrang hrangah goal 12 a khung tling ta chiah.

Eng nge an sawi?

Juventus manager Allegri chuan, "Thilsual kan ngah hle, ball kan hloh ngun bakah kan in pass fuh lo ngun hle. Kan tlar­hnung an khel ṭha tawk lo a, goal khat chauh kan chhuah kha kan vannei. Chutih rualin team ṭha tak Napoli goal-ah vawi thum kan khung thei a nih chuan kan tichhe hran lo tih a chiang," tiin a sawi.

Italian manager chuan sawi chhunzawmin, "A pawimawh ber chu hnehna chan a ni a, an khelmuala kan khelh hunah goal venhim tum ngawr ngawr chu a fuh ber lo ang," a ti.

Penalty vawi hnih an chawi avangin Napoli an lungawi lo, club director Cristiano Giuntoli chuan, "Penalty hmasa zawk kha chu tihsual awmin ka hre lo. Replay ennawn hnuah erawh Dybala khan a kutin ball a khawih a, hrem tur zawk a ni. Penalty hnu­hnung zawk phei kha chu referee thutlukna dik loh vang chauh a ni. Reina khan ball a khawih a, football-ah khatiang kha foul a ni lo," tiin a lungawi lo hle.

Napoli keeper Reina pawhin inkhel result thlaktu chu referee a ni thu a sawi, "First half kan khel ṭha hle a, Juve kha kan chhaih mangangin kan dinhmun pawh a ṭha zawk hman. Mahse, ho lam takin goal hnih kan chhuah a, a tawpah kan chak lo zui ta bawk," tiin a sawi ve bawk.