Barca leh Juve-in last 16 an lut

Barcelona-in La Liga-ah beisei phak lo mah se Champions League-ah erawh result ṭha an neih chhunzawm zel a, round of 16 lut turin Thawhlehni zan khan Dynamo Kiev chu 4-0 in an sawp. 

Lionel Messi chawlh hahdamna pek a nih hlanin Barca tan Martin Braithwaite-a'n a hming a chher a, Barca tana khel tura thiam tawk loa mi tam takin an ngaih striker hian goal hnih a khung. 

Barca tan Sergino Dest leh Catalan club a pan hnua goal khung harsat Antoine Griezmann-ten goal khat ve ve an khung bawk a, Ukrainian club-in a chhanletna tur an neih loh avangin 4-0 in Barca an chak. 

Messi inlan loh zanah Cristiano Ronaldo-a'n Juventus tan goal a khung a, Ferencvárosi chu 2-1 in an hneh. Team pahnih hi 1-1 a an inhnehtawk reng hnuin Alvaro Morata chuan hun pek belh minute hnihnaah chakna goal hi a khung a ni. 

Ronald Koeman-a'n tun hnaia zin chau Messi hruai ve ṭulin a hre lo a, Ukraine-a an inkhel tur atan Argentine forward hi chawlh hahdamna hun a pe. 

Messi awm loh laiin Braithwaite chu tun season-a a vawi khat nan bul ṭantir a ni a, goal thum a thawk chhuak nghal - minute 52-naa Dest-a goal hmahruai khung chu a siamsak a, minute nga hnuah an goal hnihna a khung zui. 

Braithwaite hian minute 70-naah ama penalty hlawhchhuah aṭangin a khung leh a, Danish player zinga Champions League match khata goal thuma inrawlh thei pahnihna a ni - Nicklas Bendtner chuan kum 2010 khan Arsenal tan hattrick a lo siam tawh!

Bench aṭanga luhtir Griezmann chuan hun pek belh minute hnihnaah goal a rawn khung ve leh a, French striker-in tun season inelna hrang hranga match 11-a khelh aṭanga goal thum a khungna chiah a ni. 

Ukrainian club an lenchilh hmain Barca-in match thum an khelh tawhah hnehna an chang vek a, last 16 lut tura draw result chiah an mamawh tawh avangin coach Ronald Koeman-a'n risk a la ngam. 

Dutch coach hian Atletico Madrid laka tlawm hlim a team aṭangin bul ṭantu player pariat ngawt a thlak danglam a, Messi bakah midfielder Frenkie de Jong chu Ukraine-a zin lo langsar a ni. 

Barca player an naupang rual a, December 6, 2016 hnua Catalan club tana Champions League starting XI an naupang ber ṭum a ni - an kum chawhrual hi 24 bak a ni lo. Mahse, heti chung hian Barca an talbuai lo.

Rawlthar rual zingah hliam vanga inkhel thei lo Gerard Pique hmun ruak luahtu, kum 21 mi  Oscar Mingueza, Francisco Trincao (kum 20) leh Carles Alena (22)-te an hmuhnawm fal a, kum 24 mi Junior Firpo pawh thai bo theih a ni lo - kum 18 mi Ansu Fati a la inhliam mah mah!

Juventus khelmualah Ferencvaros-in rin loh takin goal an khung hmasa zawk a, Hungarian champion tan  Myrto Uzuni chuan minute 19-na lekah goal hmahruai a khung - Ronaldo goal khung lawm dan ang ngeiin a lawm zui!

Kum 35 mi Ronaldo-a'n an khelmual ngeia European club tenau inhrosa a ngai thei lo a, minute 35-naah yard 20 vela hla aṭangin goal ṭha zet a khung. 

Ronaldo-a'n tun season inelna hrang hranga match sarih a khelh hnua goal kua a khungna a ni a, Juventus a pan hnuah match 96 khelin goal 74-a khung tling leh der tawh!

Real Madrid legend hian a career-ah goal 749 zet a khung tling ta a, Champions League match 172-a khelhah goal 131-a khung tawh - Champions League-a mahni muala goal khung hnem lamah Messi a nihrual chiah bawk a, home game bikah hian goal 70 a khung tling a ni. 

Ronaldo-a'n Juventus tan si phurh a sut a, Italian club-in last 16 an luh chian thuai theih nana chakna goal khungtu erawh Alvaro Morata a ni - Juve goal hnih hi Juan Cuadrado siamsak ve ve a ni. 

Team pahnih hi 1-1 in an ṭin mai dawn niin a lang hman a, draw result nen Juve an la tlang thei lo. Mahse, Real Madrid striker hlui Morata hian hun pek belh minute hnihnaah chakna goal a khung a, Italian champion buaina a chingfel. 

Kum 28 mi Morata hian Juve tan tun season-ah match 10 khelin goal sarih a khung leh der tawh a, assist vawi thum a nei bawk - Champions League bikah match li khelin goal nga a khung tawh. 

Morata hian season hmasaa Atletico Madrid tana season khata goal 16-a khung chu a lehpel ngei dawn niin a lang a, 2014-16 inkara hming a lo chher tawhna club-ah a vul leh mek.