Ciro Immobile-a'n Lazio chakpui

Ciro Immobile a dam tawh a, goal a khung nghal. Thawhlehni zan khan Lazio-in an mual Stadio Olimpico-ah Zenit Saint Petersburg 3-1 in an hneh a, Italian striker hian goal hnih a khung.

Kum 30 mi Immobile hian season liam ta khan Serie A-ah goal 36 a khung a, European Golden Shoe a dawng.

Italian forward hi vannei satliah a ni lo, tun season inelna hrang hrangah pawh match riatah goal sarih a khung leh der tawh. 

Immobile hian Covid-19 a kai avangin quarantine a ni a, kartawpa Crotone an hmachhawn ṭum khan rawn letin goal a khung nghal.

Zenit nen hian minute thumna lekah Immobile hian box pawn aṭangin kawh zetin a pet goal a, keeper Mikhail Kerzhakov-a'n ding chungin a en liam.

Lazio tan Marco Parolo-a'n minute 22-naah a khung belh a, Zenit-in minute thum hnuah Artem Dzyuba hmangin sut ṭhen mah se Immobile-a'n minute 55-naah penalty aṭangin chak nemnghehna goal a khung.

Lazio hi UCL group F-ah an awm a, match li aṭangin point riat hlawh chhuakin knockout stage lut turin an dinhmun a ṭha hle.