Champions League final ; Real lakah Liverpool-in phuba an la thei dawn em?
May 26, 2018-a thil thleng kha Liverpool fan-ten an la theihnghilh lo - kum tam tak hnuah Champions League final an lut a, mahse, an beiseina chu Real Madrid hmaah a thamral.
Inkhel ṭantir lamah Mohamed Salah-a'n hliam vangin mittui nen khelmual a chhuahsan a ngai a, vawi hnih ngawt chesual goalkeeper Loris Karius-a career-in ngai a awh leh tawh lo.
Liverpool-in kum 2019-ah nomawi chawi ta nge nge mah se an lawm a la kim lo - Real ngei hneh an duh a, Spanish club lakah phuba lak an châk tlat! Kum 2022-ah pawh team ṭha pahnih kha an lo la ṭha reng a, an intawng dawn ta!
Real nen final-ah an intum dawn tih a hriat rualin Salah-a'n, "Thungrulh hun a thleng dawn e," tiin a sawi a, zanin dar 12:30-a an inkhelh hunah an thungrulh dawn leh dawn loh chu a hriat ang.
Kan tum dawn
Liverpool-in Jurgen Klopp an nei a, German coach hian Reds-a a hnathawh avangin fak a hlawh hle - zaninah Real an hneh thei a nih chuan Merseyside club tana Champions League nomawi a chawi vawi hnihna tur a ni dawn.
Klopp hian, "Awlsam taka nomawi hlawhchhuah duh ni ila, Bayern Munich-ah khan kal turin chance ka nei ngun lutuk - kal ta ila, tun aiin nomawi ka kawl hnem tawh zawk ang.
"Mahse, kha kha ka tum ber a ni lo a, khawvel hi hnehna chang fo tawhte awmna ni loin, theihtawp chhuah ṭhinte tamna hmun a ni - chutianga theihtawp chhuah a, champion chu ka ngaihlu a ni," a lo ti tawh.
Zaninah pawh Klopp-a sawi angin Reds-in theihtawp an rawn chhuah leh dawn a, he team hian kil tinah player ṭha an kawl avangin an tawh a khirh khawp ang.
Reds ṭhatna
Liverpool tan tun season-a player langsar zingah Thiago Alcantara a tel a, Spanish midfielder che vel hi a hmuhnawm thei takzet - mahse, an league match hnuhnung berah a inhliam a, he thu buatsaih a nih lai hian a inlan theih dawn leh dawn loh a la chiang lo.
Hetihlai hian Fabinho erawh a dam chiang tawha sawi a ni a, Brazilian midfielder hi a inlan thei a nih chuan midfield-ah Jordan Henderson leh Naby Keita te nen inthlawp tura ngaih a ni.
Phuba lak châka tuihal Salah hian goal khung a châk reng a, chumi tifiahtu chu hliam dam kawr chunga league match hnuhnung bera a goal khung kha a ni. Egyptian forward hi Real tan ven bik a ṭul dawn.
Salah bakah Sadio Mane, Luis Diaz, Diogo Jota leh Roberto Firmino te an la awm cheu bawk a, Real tlarhnung lamah Thibaut Courtois hoin Dani Carvajal, Éder Militão, David Alaba leh Ferland Mendy te an ṭan mar a ngai ang.
Tun hma phak lo
Real Madrid squad en ila, 2018 final-a Reds nen an intawn lai ai khan an squad a pan tawh zawk tihah hian zep tur a awm lo - mahse, an zam phah lo ang.
Spanish club hian tlarhnungah Sergio Ramos leh Raphaël Varane thlak zo an la nei lo a, Cristiano Ronaldo vanglai tluk player lak chu thil theih lo ang deuhthaw a ni a, Luka Modric leh Toni Kroos te inkhelah an upatna hmuh tur a awm zeuh zeuh.
Liverpool erawh khatihlai ai khan an ṭha tawh zawk - Karius aiah world class keeper Alisson an nei tawh a, Dejan Lovren aia lut turin Joel Matip leh Ibrahima Konaté an awm tawh a, Fabinho, Thiago, Jota leh Diaz an nei tawh bawk.
Reds hian Premier League nomawi chawi ta chiah lo mah se League Cup leh FA Cup-ah an champion tawh a, a lungthum kim nan rin kai zawk ni chunga champion ngei chu an duhthusam a ni ang.
Mahse...
Real-in kum 2018 an phak tawh loh thu kan sawi a, chutihrual chuan he team hi coach tawnhriat nei ṭha Carlo Ancelotti-a'n a enkawl tih hriat a ṭha a, player zingah hmasawn tak tak hmuh tur an awm nual bawk.
Kum 21 mi Vinicius Junior hian tun season-a match 51 a khelh aṭangin goal 21 a khung tawh a, assist vawi 20 a nei tel - a professional career-a season duhawm ber a hmang a, tawh a khirh dawn.
Real-in Ronaldo a chhuah hnua an legend an ngaih loh chhan in hre duh em? A hming chu Karim Benzema a ni - French striker hian tun season match 45 a khelh aṭangin goal 44 a khung tawh a, assist vawi 15 a nei bawk!
Alisson, Virgil van Dijk, Konaté, Trent Alexander-Arnold leh Andy Robertson te tan hna a awlsam dawn lo tihna a ni a, match khata engkim chinfel tur a nih avangin chetsual a thiang lo.
Inkhel chhehvel
• Liverpool leh Real Madrid hi vawi riat an intawng tawh a, Madrid khaw club-in vawi li hnehna changin Liverpool hian vawi thum hnehna an chang - vawi khat an inhnehtawk.
• Vawi riat an intawnah Real-in goal 10 an khung a, Liverpool-in goal riat an khung thung.
• Champions League-a Real Madrid tana goal khung hnem ber Cristiano Ronaldo-a'n goal 105 a khung a, Liverpool tana CL goal khung hnem ber Salah chuan goal 34 an khung.
• Real Madrid boss Carlo Ancelotti-a'n Champions League nomawi pathum a chawi tawh a, AC Milan chu vawi hnih champion puiin, Real Madrid vawi khat a champion pui tawh.
• Ancelotti hi CL final vawi li a khelhah vawi khat chiah a tlawm a, vawi khat Liverpool a ngam lo a, vawi khat a hneh bawk - a vawi nga nan final a lut leh ta a, heti zat CL final lut thei coach hmasa ber a ni.
• Jurgen Klopp-a'n Champions League final vawi thum a thleng tawh. Borussia Dortmund chu vawi khat luhpuiin a chak zo lo a, Liverpool chu vawi hnih luhpuiin vawi khat a chakpui a, vawi khat an tlawm - a vawi li nan CL final a lut leh ta.
Inlan tura beisei
Liverpool (4-3-3): Alisson; Alexander-Arnold, Konaté, Van Dijk, Robertson; Henderson, Fabinho, Keïta; Salah, Mané, Luis Díaz
Real Madrid (4-3-3): Courtois; Carvajal, Éder Militão, Alaba, Mendy; Kroos, Casemiro, Modric; Valverde, Benzema, Vinícius Júnior
Champions League Final - May 26, 2018
Real Madrid 3 - 1 Liverpool
REA: Karim Benzema 51'; Gareth Bale 63', 83'
LIV: Sadio Mané 55'
Champions League Final - May 28, 2022 (Inrinni Zan)
Liverpool 12:30 AM Real Madrid
• Champions League final hi Sony Ten 2-ah a en theih dawn a, online-a en duh tan JioTV leh Sony LIV app kaltlangin a en theih bawk.
European Cup/Champions League Record
Liverpool
Final Chak Tlawm
9 6 3
• English club zingah Liverpool aia champion hnem an awm lo.
• Reds hian final match kua an khelhah vawi 13 goal an khung a, vawi 11 an chhuah thung.
• CL final an inlan hnuhnung berah Liverpool hian 2-0 in Tottenham Hotspur an hneh
Real Madrid
Final Chak Tlawm
16 13 3
• Champions League-ah Real Madrid aia champion ngun an awm lo.
• CL final match 16 an khelh aṭangin goal 42 an khung a, an lamah goal 23 a lut thung.
• CL final an inlan hnuhnung ber chu kum 2018 kha a ni a, Real Madrid-in 3-1 in Liverpool an hneh
Champions League final : Thlir châkawm bik
Tun season UEFA Champions League chu ziah zawh a ni dawn ta a, a bung tawp ber leh pawimawh ber chauh ziah a ngai ta. Paris khawpuiah Liverpool-in Real Madrid lakah phuba lak an tum dawn a, League Cup leh FA Cup an champion tawh avangin nomawi pathumna tur a ni tih hriat tel a ṭha bawk.
Chinfel Ngai
Kum li liam ta khan Real Madrid-in UCL final 2018-ah Liverpool an hneh a, Reds thiampuipa Mohamed Salah chu hliam vangin darkar chanve lekah lakchhuah a ni.
Eypgtian forward Salah hian Real Madrid hmachhawn nawn a châk thu hi a zep lo. Salah chuan, "Chinfel tur kan ngei," tiin Los Blancos hmachhawn a châk thu a sawi.
Rilru paukhauh
UCL semifinal second leg an khelh ṭumah Jurgen Klopp chuan, "Inkhelh hmain ka naute bulah 'Rilru paukhauhten khua an rawn tlawh e' tih awm se ka duh thu ka hrilh," tiin a naute an fuihna a sawi chhuak. Yellow Submarine-in Reds hi an ti hlauthawng hman a, mahse second half-ah an rilru paukhauhna a rawn lang.
Amaherawhchu an khingpui tur Real Madrid hian khelmualah an rilru paukhauh zia an pholang ve bawk. Los Blancos hian final thleng turin PSG, Chelsea leh Manchester City te lakah an tho chhuak vek.
Arnold vs Vini Jr
Madrid media te chuan semifinal-ah Vinícius vs Phil Foden te chu football-a talent nei ṭha ber an nih thu an ziak a, final-ah erawh Vini Jr leh Trent Alexander-Arnold te inhmachhawn chu en châkawm chu a ni.
Alexander-Arnold hi a defending ai mahin a attacking vangin fak a hlawh ṭhin a, final-ah hian Vini Jr lakah a mualpho ang nge hming chher nan a hmang zawk dawn. Chutihrualin defender ṭha mi Virgil van Dijk leh tun inelnaa goal 15 ngawt khung tawhtu Karim Benzema te inhamchawn tur chu en a châkawm hle.