BVT nulaten volleyball thiam ber

Zothan Autoworks Pro Volleyball League hmeichhe huangah Bethlehem Vengthlang an champion. BVT hian final an luhna hmasa berah Bungkawn chu 18-25, 25-21, 25-14, 25-20 a hnehin nomawi an chawi.

Bethlehem Veng-thlang hian league round lama an hneh loh hnehin an champion a, an tan chuan a lawmawmna a thuah hnih ngei ang. Final boruak sangah BVT hian set hloh hmasa mah se, best spiker atana thlan Elisian Medaii hoin an tho chhuak.

Elisian Medaii hian Bungkawn lakah point 27 tehmeuh a nei a, point 22 neitu Lalmuanpuii nen an thawhhlawk hle. An vawi khat champion-na ni mah se mimal chawimawina dang zawng zawng pawh hui vek khawpin an khel ṭha.

BVT champion puitu Elisian-i hian a zawnin vawi thum ngawt D3 Business Player of the Night lawmman a dawng, tournament chhunga player ṭha ber atana an thlang hi a mak lo, a phu ang ngeiin chawimawina a dawng.

Bungkawn erawh an vanduai a kal tluang. Season hnuhnung berah pawh khan league round hmahruaitu an ni a, mahse final-ah an chak lo. Kuminah pawh champion tura rinkai ber ni chungin pahnihnaah an lungawi leh a ṭul.

PVL hmeichhe huangah hian team pali - Bungkawn, BVT, Kanan leh Durtlang te an inel. Vawi khat ṭheuh an inkhelh kual hnuah a sang pahnihin final hi an khel a ni.