Mizoram Football Association khawmpui neih a ni

Nimin khan Mizoram Football Association (MFA) chuan Synod Conference Centre, Aizawlah Annual General Body Meeting an hmang a, Mizoram District hrang hranga Football Association hruaitute nen football hmasawnna tura rawtna hrang hrangte ngaihtuahin ro an relho a ni.

Football khawmpui a khual-lian H. Lalzirliana, MLA, Vice Chairman, Road Infrastructure Development Board chuan District tina football hruaitu, mawhphurhna sang tak neite inpekna ropui a tihzia a sawi. Khual zahawm atan Dr. K. Pachhunga, MLA hman a ni.

MFA President Pu Lal Thanzara chuan District football association hruaitu thar te chu thatho taka thawk zel turin a ngen a. Mizoram a football zirna sikul ṭha Tata Trusts Center of excellence tawp ta chu MFA-in a uizia a sawi bawk.

MFA honorary secretary Lalnghinglova Hmar chuan kum (season) kal ta chhunga report a pe a. Hri leng a ziaawm hnua kuminah inelna kalpui a nih chhoh leh dante, Saitual DFA in MFA Cup 2022 hlawhtling taka an thlen dan te, Mizoram women's team in National Senior Women's Championships a semi final an thlen chhoh dante, AFC-AIFF C License course hlawhtling taka buatsaih a ni leh ta te, Hnahthial a Inter District Junior Boys Championships khelh a ni leh ta te chu football in ngai a awh chho leh ta a ni tih lantirtu a nih thute a sawi a ni.

MFA hian All India Football Federation (AIFF) hnuaia Match Commissioner pahnih Lalrawngbawla leh R. Malsawma bakah National Referee F. Zohmingliani te hnenah lawmpuina leh chawimawina an hlan a, mual liam ta T. Vanlalhluna, Executive Committee member sunna hun an hmang bawk.

Thurel chu
Sairang Dinthara MFA Ground kiangah Hostel sak mek a ni a, hei hi zawh fel a nih hunah MFA chuan Residential Football Academy din a duh a, MFA Annual General Body Meeting chuan a pawm pui. Sairang Dintharah Residential Football Academy din a ni dawn.

Mizoramah player inziah luhna AIFF Centralised Registration System (CRS) hman tura rawtna chu pawm a ni a, bawhzui ṭhat dan a zirin hmasawnna pawimawh tak a ni thei ang.

CRS-ah hian ISL leh I League player zawng zawng pawh ziahluh an ni a, kum naupang tak aṭanga ziahluh ṭan a nih chuan kum bithliah inelnaa kum dik lo ṭhahnem tak a su kiang ang.

Referee tam zawk neih theih nan Development Course neih a ni dawn a, District FA tinin referee panga aia tlem lo an tirh a ṭul ang. Football hmasawn nan footballer an pawimawh ang thoin referee ṭha an pawimawh a ni.

Inelna neihna tur
Kum 2022-2023 season thara MFA Cup thleng turin Khawzawl DFA thlan an ni a. Junior Boys (Under 17) Championship thleng turin Kolasib DFA ruat an ni bawk.

Inter District Women's Championship khelhna tur chu ruahmanna la siam leh tur a ni ang. Mizoram hmun hrang hrangah artificial turf phah a ni a, Inter District football pawh artificial turf-ah khelh a ni chho a, khawpui leh thingtlang inkar a zim sawt hle.