NBA Finals-ah Golden State an lut

Golden State Warriors chuan an ropuina ram an thleng leh ta. Steve Kerr-a enkawl team hian Dallas Mavericks 120-110 a hnehin NBA Western Conference champion an ni a, NBA champion ni tur erawhin hmabak an la nei.

Tun hnai season hnih chhung chu Warriors hi hliam vangin an buai - NBA Finals mai ni loin playoff pawh an khel phak lo. Kuminah erawh an player ṭha an khel kim thei a, best of seven series chu 4-1 a lain an tlang; Mavericks tan thawk lakna hun an siamsak meuh lo.

Warriors hian NBA Finals-ah chuan Boston Celtics leh Miami Heat inkhela chak zawk an hmachhawn leh ang. Eastern Conferenc Finals-ah Boston hian series-ah 3-2 in hma an hruai mek, tlang turin match khat an la mamawh - tukinah game 6 khelh a ni.

GSW an ropui
Golden State Warriors hian an player chher chhuah hmangin NBA an thunun a ni ber, tun hnai kum riat chhungin NBA Finals vawi ruk an lut thei. Kum 1990 hnu lamah season riat chhunga a thiam ber inchuhna thleng thei hi GSW ni loah chuan Chicago Bulls chiah an la awm.

Warriors hian 2015, 2017 leh 2018 khan NBA title an la, player ropui LeBron James awmna Cleveland Cavaliers an hneh; 2016 leh 2019-ah erawh an chak lo zawk an ni thung. Tun hnai season hnih pawh hliam vangin an buai, playoff pawh an khel phak lo.

Bulls vanglai ang kha an tawng chho ve mek zel. 1991-1998 chhung khan Michael Jordan awmna Bulls khan NBA title vawi ruk ngawt an la thei, khatih laia an player pawimawh zinga mi chu tuna Warriors coach Steve Kerr a ni.

Kerr chuan, "Season riat chhunga final vawi ruk luh chu thiam vang chauh a ni lo, vanneih tel a ngai. Heng pahnih bakah hian thawhrimna leh thawhhona ṭha a pawimawh bawk, kan lawmna hi sawifiah a harsa," a ti.

Hmabak a la awm
Western Conference champion an ni a, hna an zo tihna erawh a la ni lo. NBA champion ni tur chuan Eastern Conference champion an hneh leh phawt a ngai dawn, star player Stephen Curry chuan hmabak hautak an la neih thu a sawi.

Warriors hi Curry kuta innghat ngawt an ni bik lo. Game 5 inkhelah pawh point 32 neitu Klay Thompson a langsar, ani bakah hian Draymond Green, Andrew Wiggins, Jordan Poole leh Kevon Looney te pawhin hna pawimawh an thawk vek.

NBA Most Valuable Player vawi hnih ni tawh Curry chuan, "NBA Finals kan lut leh thei hi ka lawm, kan tan chuan malsawmna a ni. Kan khelmual thar kan luah hlim a ni a, hetiang hun kan tawng chhunzawm hi a nuam takzet," a ti.

Chase Centre hi 2019 aṭanga an luah a ni a, kumin aṭangin playoff khelh nan an hmang. An khelmual tharah hian NBA playoff match an khelh tawh hoah tlawm an la nei miah lo, team dang tana lenluh chak awm lo tak a ni ngei ang.

Western Conference Finals
Game 1: Golden State Warriors 112 - 87 Dallas Mavericks
Game 2: Golden State Warriors 126 - 117 Dallas Mavericks
Game 3: Dallas Mavericks 100 - 109 Golden State Warriors
Game 4: Dallas Mavericks 119 - 109 Golden State Warriors
Game 5: Golden State Warriors 120 - 100 Dallas Mavericks
(Golden State hian 3-1 in series an la)

Eastern Conference Finals
Game 1: Miami Heat 118 - 107 Boston Celtics
Game 2: Miami Heat 102 - 127 Boston Celtics
Game 3: Boston Celtics 103 - 109 Miami Heat
Game 4: Boston Celtics 102 - 82 Miami Heat
Game 5: Miami Heat 80 - 93 Boston Celtics
May 28, Inrinni
Game 6: Boston Celtics 06:00 AM Miami Heat
May 30, Thawhṭanni
Game 7: Miami Heat 06:00 AM Boston Celtics
(Celtics lamin series-ah 3-2 in hma an hruai)
Note: Best of seven series hmangin chak zawk zawn a ni)