Final zinkawng ngaihnawm chu

Champions League final-ah Liverpool leh Real Madrid an intawng dawn a, European football-a a thiam ber nih inchuh tura club pahnih zinkawng hi thil awlsam a ni lo - zaninah champion an inchuh dawn.

Liverpool hi an zinkawng a awlsam zawk deuha sawi ni mah se group stage-a Atletico Madrid, FC Porto leh AC Milan paltlangtu an ni a, sawi nep sak a rem lo.

Real Madrid-in final lut turin tluk leh din an fawm a, knockout stage china an hmachhawn Paris Saint-Germain, Chelsea leh Manchester City paltlang ringawt pawh hi uang taka awmna tham a ni.

Club ropui pahnih zinkawng ngaihnawm phenah coach ropui pahnih an awm a, player ropui tak tak an kuh ṭul a, club pahnih fan-ten a sing telin Paris khawpui an pan bawk - zanin zet chu i meng rei ang aw!

Champions League group stage-a team awm tur puan a nih khan group B-ah Liverpool an awm a, Atletico Madrid, FC Porto leh AC Milan te nen an awm - an hmingah group of death an ti.

Atletico hi hetihlai hian La Liga champion an ni a, Porto leh Milan pawh hi tun season-ah an league-ah ve ve an champion - team pathum ṭhatzia inhrilh nawn a ngai lo.

Mahse, Liverpool-in awmpuite hi an ṭha tih an lo hre ve lo! Group stage match rukah hnehna an chang vek a, goal 17 zet khungin an lamah goal ruk chiah a lut.

Reds hi an group-a pahnihna Atletico aiin point 11-in an sang zawk a, last 16 an lut chiang hle - knockout round-ah Inter Milan, Benfica leh Villarreal an hneh.

Thawhlehna neitu?
Real Madrid-in group stage an match hnihnaah mak takin Sheriff Tiraspol ngam lo mah se an insiamṭha nghal a, match ruk an khelhah vawi nga chakin last 16 an lut chiang - Sherif bakah Inter Milan leh Shakhtar Donetsk te an paltlang.

Round of 16-ah Real hian Paris Saint-Germain chu first leg-ah 1-0 in ngam lo mah se second leg-ah 3-1 a hnehin an tlang a, quarterfinal first leg-ah 3-1 a Chelsea an hneh hnuin second leg-ah minute 80 thleng 3-0 in an hnufual a, mahse, Rodrygo leh Benzema ten goal rawn khungin an paltlang leh tho!

King Carlo naute hian semifinal-ah pawh 4-3 in Manchester City ngam lo hmasa zet mah se second leg-ah 3-1 in comeback ropui an lantir a, 'comeback neitu' tia sawi ngam an ni.

A tawi zawnga sawi chuan Liverpool tan fimkhur a ṭul dawn - goal khung hmasa pawh ni se inkhel boruak sanga talbuai lo turin Real an paukhauh tawk a, chuti mai chuan tlawm an tum lo ang!

An khelh dan
Liverpool-in 4-3-3 formation hmang chungin pressing game an khel leh ang tih chu thil chiang a ni a, Salah, Mane leh Diaz an inlan a nih chuan a laiah Mane a awm ang a, 'Flase 9' ang deuha awmin mual sir aṭangin Salah leh Diaz an tlan lut hnem leh ang.

Thiago a inlan thei a nih chuan a ball thiamna leh finna chu Liverpool-in an chhawr leh tur a ni dawn a, Real goal nawr na tur dang chat turin Fabinho a ṭangkai ang a, mual sir aṭanga attacking pui turin Arnold leh Robertson an inring bawk ang.

Liverpool player-ten 'neuro 11 brain sensor' hmang chungin training an nei a, he technology hian direct-in mihring thluakah hna a thawk a, rilru paukhauh pu turin a pui thei dawn - an ti! A ṭhat leh ṭhat loh zaninah a hriat ang.

Ancelotti-a'n 4-3-3 formation tho hmangin, tlarhnung aṭangin game a siam ṭhin a, goalkeeper Thibaut Courtois a pawimawh - tlarhmaah centre forward Benzema chu a hmawr bawk tura an dah a ni ṭhin a, French striker khelh danin Real dinhmun thui takin a hril ang.

Everton & Milan tan
Real boss Ancelotti-a'n Madrid khaw club tana nomawi chawi piah lamah Liverpool hneh ngei duh chhan pakhat a nei - AC Milan leh Everton tan Klopp leh a naute hi kut ruaka haw tir a duh.

Everton coach hlui King Carlo chuan, "Ka tan chuan Liverpool nena kan inkhel tur hi 'derby' ang a ni a, Evertonian ka la ni reng a ni," a ti a, Goodison Park lawmna tur a sawi.

Liverpool hi an chak chuan a vawi sarih nan an champion dawn a, Champions League nomawi chawi hnem lamah AC Milan an tluk chiah ang - Milan legend Ancelotti hian thlentir a duh lo ang.

Ancelotti chuan, "Season ṭantir aṭang khan team ṭha hlir kan tum a, Champions League nomawi chawi theia inngai PSG, Chelsea leh City pawh kan tum tawh - ka player leh fan ten fak an phu a, he club jersey hak hi a namai lo a ni," a ti a, team ṭha an hneh nual tawh thu sawiin Liverpool a vau.

Carlo, kan lo kal e!
Ancelotti leh Liverpool sawi a nih chuan rilruah thil lang pakhat a lo awm nghal ṭhin - kum 2005-ah Reds-in ropui taka Carlo enkawl AC Milan an hneh kha! Vawiin thlengin football chanchin ngaihnawm sawinaah sawi hmaih a ni ngai lo.

Khatihlaia star player rual kawltu AC Milan hian Reds lakah 3-0 in hma an hruai a, mahse, Steven Gerrard hoa khel Liverpool-in rilru huaisen leh paukhauh pu chungin si phurh an sut zo a, penalty-ah an chak zui.

Liverpool boss Jurgen Klopp chu Real nen an inkhel tur chungchangah BT Sport nen an inkawm a, King Carlo hi a kap - Champions League 2005 chungchang an sawi chhuak a, Klopp hian, "Khatihlaia AC Milan coach kha tu nge?" tiin amah kawmtu a zawt.

"Ancelotti,” tia rang taka chhan a nih rualin Klopp hian nui chungin, "Ka hria alawm...Carlo, i tan kan lo kal e," a ti zui - Ancelotti hliam reh thei loah chi a phul a, Klopp-a'n coach ropui hneh ngei a tum.

Nomawi ropui
Tun hnaiah Pep Guardiola-a'n Champions League nomawi aia Premier League nomawi hlut zawk thu a sawi a, Jurgen Klopp leh Ancelotti ngaihdan erawh a dang thung.

Klopp chuan, "Ka tan chuan khawvela inelna ropui ber a ni. Season hmasaa kan hun hman dan en chuan, tun anga kan thawh leh theih hi tuman an ring lo - mahse, season ropui tak kan hmang a, fan leh player te kan inpawh em em a, he club-a ka awm hi nuam ka ti hle," a ti.

Liverpool-in tun season-ah harsa takin Champions League an khel hram a, vawi khat chiah tlawm chungin final an lut - League Cup leh FA Cup an chawi tawh sa belhchhah turin champion an mamawh.

Mahse, Ancelotti-a'n kut ruaka haw a tum bik lo. Italian coach chuan, "He nomawi kan chawi chiah hi chuan inelna zawng zawnga pawimawh ber nomawi chawi ang mai kan ni a, kan hna kan hlen avangin a nuam duh em em a ni," a ti - a hna hlen turin vawi khat chak chiah a ngai ta.

Kei, Liverpool leh Real Madrid karah eng inhuatna mah a awm lo. Football match, level sang tak kan khel dawn a, hnehna kan chang ta a nih pawhin kum 2018-a thil thleng, kan chak zawh loh avanga phuba lakna a ni dawn lo. Khelmualah thutlukna kan siam fuh avang chauha champion tur kan ni a, kan tih theih ngei pawh ka beisei a ni. - Jurgen Klopp, Liverpool manager

Team ropui tak pahnih kan intawng dawn a, a tawpah huaisen leh paukhauh zawkin hnehna kan chang ang. Liverpool hian player ṭha tak tak an nei a, rang taka game khelin an thawhhona a ṭha em em bawk. Khawvela team ṭha ber pawl an ni a, an coach pawh coach ṭha tak a ni - kan inpawh hle nghe nghe. Pressing na tak nen football-ah thil thar a rawn keng a, hna ṭha tak a thawk a ni. - Carlo Ancelotti, Real Madrid coach