Chelsea an par vul zel

Champions League group stage-ah match hnih khelh tur a la awm chungin Chelsea leh Sevilla ten knockout stage an lut der tawh. Thawhlehni zan inkhelah Blues leh Sevilla hian an khingpui Rennes leh Krasnodar te chu 2-1 ve vein an hneh hram a ni.

Roazhon Park-ah mikhual Chelsea-in Callum Hudson-Odoi hmangin minute 22-naah goal khung hmasa mah se minute 85-naah Serhou Guirassy hmangin French club-in an sut. Inhnehtawk thei dinhmuna an din hnuah substitute Olivier Giroud-a'n injury time-ah chakna goal a khung.

France rama thil awm dan leh Krasnodar Stadium-a thil thlen dan a inang hle. Mikhual Sevilla-in minute lina lekah Ivan Rakitic hmangin goal hmahruai an khung a, Russian club tan Wanderson-a'n minute 56-naah siphurh a sut. Julen Lopetegui hoten a tawpah team ṭha zawk an nihna an pholang a, injury time minute nganaah Munir El-Haddadi-a'n goal pawimawh a khung.

Germany international Timo Werner chuan Rennes an hmachhawn hmain Sevilla nen group hmahruaitu nih an inchuh tur thu a sawi a, Chelsea striker hian a sawi dik. Blues leh Spanish club hian point 10 ve ve an hmu a, an pahnih inkhelh huna chak zawk hi group E hmahruiatu an ni ang.

Table thlirin Chelsea leh Sevilla hian an thunun viauin lang mah se Thawhlehni zanah erawh an chak ṭawk ṭawk ve veah a ngaih theih. Rennes manager Julien Stéphan chuan, "Football-ah chuan kan phu ang kan hlawhchhuah loh ṭum a awm. Ka naute khan Chelsea tan buaina an siam zing hle. A tawpah erawh kan vanduai takzet," tiin an vanduai thu a sawi.

Krasnodar coach Murad Musaev chuan, "Tumah dem theih a ni lo, keimahni thiam loh a ni. Hun tawp thlenga ṭang thei tur kan nih laiin a tawpah kan inthlahdah a, hun lo takah goal kan chhuah," tiin a naute a chhan lo thung.

Rennes leh Krasnodar ten point hlawhchhuah phu mah se group stage paltlang erawh an phu lo. Group E aṭangin team ṭha pahnih Chelsea leh Sevilla an tling.

Chelsea hian Pathianni zanah Tottenham Hotspur an hmachhawn dawn a, Champions League-a dinhmun ṭha tawh Frank Lampard-a tan si ruk laa France rama zin a ṭul lo.

Blues manager Lampard chuan, "Kan khelh hmasak tur zel hi a pawimawh a, chutihrualin league-a kan khelh tur pawh kan thlir tel a ṭul. Pathiannia kan inkhelh tur hi a pawimawh a, Spurs nen chuan team inhal tak kan nih avangin uluk taka inpuahchah a ṭul a ni," tiin Tottenham nena an inkhelh tur chungchang a sawi.

Premier League hmahruai mektu Tottenham hian zanin hian Europa League-ah Ludogorets an mikhual ang a, Chelsea aiin inpuahchahna hun an nei tlem ang.

Chelsea chanchin an sawiin Olivier Giroud aiin player thar Timo Werner, Hakim Ziyech, Kai Havertz, Thiago Silva leh Edouard Mendy chanchin an sawi ri tam zawk.

French forward Giroud chanchin a rik chhunah pawh a khelh tam loh thu sawina a ni fo a, France coach Didier Deschamps pawhin club tana khelhna hmun a chan tam tawk loh chuan Euro Championship-ah khelhna hmun chang lo thei dinhmuna a din thu a sawi tawh.

Kum 34 mi Giroud hian media hmaah a vui thu a sawi lang lo a, amaherawhchu khelhna hmun an pek ṭumah erawh a tih tur a ti ṭhin. Tun season-a Chelsea-in Champions League an khelh theih chhan hi season liam taa Giroud-a'n hun pawimawha goal a khung ṭhin vang a ni.

Tun season-ah erawh Giroud hian league-ah goal a la khung lo a, dem theih a ni lo. French striker hi vawi li chiah league-ah a la inlan a, match lia a inlan zat belhkhawm hi minute 36 chauh a ni.

Champions League-ah pawh match hnihah minute 48 chauh a la khel a, Rennes lakah goal pawimawh a khung avangin Frank Lampard-a'n tawnhriat nei striker a neih avanga a vanneihzia a hriat phah ang.

Chelsea manager Lampard chuan, "Zanina a tih ṭhin ang hian ṭum dangah pawh a ti ṭhin. Goal a khung chauh hi a ni lo a, tharum hmanga ball a lo la thla ṭhin 

te hi a pawimawh hle," tiin team tana a pawimawh thu a sawi.