Pathianni zanah Premier League khel tur zawnna Huddersfield vs Nottingham Forest

EFL Championship Playoff final chu May 29, Pathianni zan dar 9:00 hian Wembley Stadium-ah Huddersfield leh Nottingham Forest ten an khel dawn. Heta chak zawk hian season tharah Premier League an khel ang.

Premier League aṭangin Burnley, Watford leh Norwich City te an relegate a, Championship aṭangin champion Fulham leh pahnihna Bournemouth te an tling tawh. Huddersfield leh Nottingham ten hmun ruak pakhat hi an hnawhkhat ang.

Sum tamna ber?
Championship playoff hi Premier League khelh leh khelh loh inkar a nih tawh avangin sum tamna ber ang hiala sawi ṭhin a, a dikna chen pawh a tam hle.

Premier League khelh phak hian hamṭhatna ṭhahnem tak a awm. Playoff-a chak zawk sum lakluh hi a pung dawn a, season thum chhungin pound maktaduai 135 tala pung tura ngaih a ni.

Season hmasa bera an relegate lo a nih phei chuan season nga chhunga an sum lakluh chu pound maktaduai 265 thlengin a pung chho thei ang. Hemi a nih avang hian Championship playoff-a chak hi a pawimawh takzet.

A phu pahnih
Championship final thleng turin Huddersfield Town-in Luton Town an hneh a, Nottingham Forest-in Sheffield United an hneh bawk. Hudderfield hi leh Nottingham te hi league-ah pathumna leh palina an ni a, final khelh phu pahnih an ni.

League-ah team pahnih hi vawi hnih an inkhel a, an intawn hmasak ṭumin Nottingham Forest 2-0 in an chak. An intawn hnuhnun zawkah Huddersfield 1-0 in an chak thung. Mak ang reng tak erawh mahni mualah an chak lo ve ve.

FA Cup fifth round-ah an inhma-chhawn a, Forest hian an mual City Ground-ah Huddersfield hi 2-1 in an hneh. Forest hian quarterfinal hial thleng zui mah se champion zui ta Liverpool lakah 1-0 in an tlawm.

Inkhel tur chu
Nottingham Forest-in forward Lewis Grabban leh defender Max Lowe te an chhawr thei dawn lo a, chânna lian tak a tih theih ang. Grabban hian tun season-ah goal 13 a khung a, chutihrualin player pahnih tel lo hian playoff semifinal-ah an chak.

Forest innghahna James Garner hi Manchester United aṭanga loan hmanga an hawh a ni a, Dutch manager Erik ten Hag pawhin uluk takin playoff final hi a thlir a rinawm.

Huddersfield midfielder kum 29 mi Ollie Turton a dinhmun a chiang lo a, player dang erawh an dam ṭha. Terriers tan kum 31 mi Danny Ward chu tlarhmaa an innghahna a ni dawn. Ward hian tun season-ah goal 14 a khung tawh a ni.