Harsatna nei chungin Halep a liam

Simona Halep chu French Open second round-ah a tla. Romanian star hian Chinese tleirawl Zheng Qinwen a ngam lo, inkhel tlang thei tho mah se set hnihna aṭangin a taksa lamah harsatna a nei.

Roland Garros 2018 champion Halep-i'n bul a ṭan fuh a, set hmasa pawh harsa vak loin a la. Mahse, set hnihna an khelh lai aṭangin thawk lamah harsatna a nei, a tawpah 2-6, 6-2, 6-1 in a chak lo.

Kum 30 mi Halep chuan, "Tun hmain khatiang harsatna kha ka la nei ngai lo. Eng vanga lo thleng nge pawh ka hrethiam lo, inkhelh hma chuan buaina engmah ka nei hmasa lo. Thawk a harsat kha chuan engkim a buaithlak vek," a ti.

World number 1 hlui chuan sawi zawmin, "Match kan khelh zawh hlim kha chuan ka hlauthawng hman viau, a hnu zelah erawh ka dinhmun a ṭha. Amaherawhchu, hriselna dinhmun erawh endik a ngai dawn," a ti.

Halep bakah hian Karolina Pliskova pawh a tla. Wildcard hmanga inlan world number 227 Leolia Jeanjean chuan Pliskova hi 6-2, 6-2 in a hneh a, seeded pakuana Danielle Collins pawh Shelby Rogers hneh loin a zinkawng a tawp ve bawk.

Player langsar an tla nasa, seeded sang zual 10 zinga pasarih ngawt an tla tawh. Rinkai an chak loh sup sup lai hian world number 1 Iga Swiatek erawhin a hmaa ding apiang a hneh hmiah hmiah mai thung.

Polish nula Swiatek hian Alison Riske 6-0, 6-2 a hnehin French Open third round a inhlangkai, tun hnaiah a zawnin match 30 chhung a chak zawn ta, a hmaa ding nih a châkawm lo khawp ang.

Hmeichhe tennis-ah hian chak zawn rei ber chu Martina Navratilova a ni a, kum 1984 khan match 74 chhung a zawnin a chak. Serena Williams kha kum 2013 khan vawi 34 a chak zawn bawk - Serena umphak turin Swiatek hian match li chak a la mamawh.