Pathianni zanah IPL final

Cricket inelna ngaih-hlut Indian Premier League final chu May 29, Pathianni zan hian khawvela cricket stadium lian ber Narendra Modi Stadium-ah khelh a ni dawn.

Final-ah hian Gujarat Titans leh nizan qualifier 2 inkhela chak zawk an inhmachhawn dawn. Nizan khan Rajasthan Royals leh Royal Challengers Bangalore te an inkhel a, result kan hre hman lo.

Titans hi league round-ah pakhatna an ni a, final lut turin qualifier 1-ah Rajasthan Royals an hneh leh bawk. IPL team thar ni mah se Titans hi Hardik Pandya captain-na hnuaiah an che ṭha a; batting lamah Shubman Gill, Wriddhiman Saha leh David Miller te an rintlak.

Bowling lamah all rounder ṭha mi Rashid Khan bakah Mohammed Shami leh Lockie Ferguson te an kawl bawk avangin Royals emaw Royal Challengers emaw pawhin final lut se champion tura rinkai an ni.

Final khelhna tur Narendra Modi Stadium hi Gujarat-a mipui tamna ber khawpui Ahmedabad-a awm a ni a, hemi a nih avangin Titans-in ṭantu an nei ngah ang. Chutihrualin final a nih tawh chuan engpawh a thleng thei. Rajasthan-in danglamna thlen thei Jos Buttler an kawl a, Bangalore-in Virat Kohli an kawl tih hriat a ṭha.