Medvedev a tal buai lo

Daniil Medvedev hi clay court-a inkhelh thiam tak a ni lo. French Open ṭan hma pawhin beisei a neih san loh thu a sawi lawk, match hnih a khelh tawh chinah erawh Russian tlangval hi a khel ṭha thei hle.

Ningani zan second round inkhelah world number 2 Medvedev hian Laslo Djere chu 6-3, 6-4, 6-3 in a hneh. Match hnih a khelh tawh chinah set a la hloh miah lo, tie break khelh ngai pawhin a la awm lo hial.

Kum 26 mi Medvedev chuan, "Inkhel awlsam lo tak a ni, hnehna ka chan theih avangin ka lawm. Laslo hi clay-ah a khel ṭha thei hle, mahse a ball vuak hmachhawn dan ka zir lawk a, chu chuan nasa takin min pui," a ti.

Inkhel dangah Stefanos Tsitsipas a chak hram. Season hmasa finalist hian a match hmasa zawkah set nga a khel, tun ṭumah pawh hian Zdenek Kolar chu 6-3, 7-6 (10-8), 6-7 (3-7), 7-6 (9-7) in a hneh hram.

Greek tlangval hian tournament tir lamah thahrui a hmang nasa, a thleng sang a nih chuan round sangah a chau dawn. Chuvangin thleng sang tur chuan set hloh loa chak theih hi Grand Slam bikah chuan duhthusam a ni.