Blasters leh Highlander an intawng dawn

Zanin dar 7:30-ah ISL inkhel a awm leh dawn a, match hmasa bera ATK Mohun Bagan ngam lotu Kerala Blasters leh NorthEast United an inkhel ang. 

Kerala Blasters hian defender Lalruatthara leh midfielder K.Lalṭhathanga an kawl a, player pahnih hi Bagan lakah bench aṭanga luhtir an ni. 

Highlander-in quarantine lai Lalkhawpuimawia leh Rochharzela te an la chhawr thei dawn lo a, an match hmasa bera Mumbai City an hneh ṭumin Lalrempuia Fanai leh Lalengmawia ten inkhel bul an ṭan. 

Blasters-in an match hmasa bera Bagan an ngam loh avangin hnehna chan ngei an duh dawn a, Spanish coach Kibu Vicuna hnuaiah game mawi khela hnehna chan leh an tum ang. 

Highlander erawh Gerard Nus hnuaiah defensive game an khel a, Mumbai City an hneh thei - hriat tur chu he team hian defensive game thiam hmingthang, Indian coach Khalid Jamil chu assistant coach-ah an nei. 

Vicuna-a game mawi hmanga Blasters-in defensive game hlawhtlinpui tumtu Gerard Nus-a team an hmachhawn tur hi hmuh châkawm a tling.