Real Madrid ropuina belhchhahtu 'Decimocuarta'

European football-a club ropui ber Real Madrid chuan an ropuina belhchhah nan Inrinni zan khan Liverpool 1-0 in an hneh a, a vawi 14 nan European champion an ni.

Inrinni zan khan Paris khawpuiah Champions League final khelh a ni a, Los Blancos tan Vinicius Junior chuan second half-ah goal awm chhun a khung. Liverpool-in attacking football hmuhnawm tak khel mah se a chhan letna an nei lo a, Jurgen Klopp-a hote hian League Cup leh FA Cup final-ah pawh hun pangngaiah goal an khung lo!

Carlo Ancelotti chu coach zinga European champion ni ngun ber niin a vawi lina atan a team enkawl a champion-pui a, player a nihlaiin vawi hnih a lo champion tawh bawk.

An ṭhat dan ber
Real Madrid leh Liverpool te hi an sulhnu vang ringawt pawhin 'dream final' tih theih an ni a, final khelh hmaa team pahnih champion zat belhkhawm hi vawi 19 a ni.

Los Blancos-in season ṭha tak hmangin La Liga nomawi an chawi a; Premier League lamah Reds-in pakhatna Manchester City chu point khat chiahin an pha lo. Chutihrualin Jurgen Klopp-a hote hian league nomawi chawi lo mah se League Cup leh FA Cup-ah an champion ve ve avangin 'Cup Treble Champion' an beisei.

Real-in hahdamna hun ṭha an neih bakah Carlo Ancelotti-a'n a duh dan thlapin player a rem thei a, player inhliam an nei lo.

Reds pawh league-ah fixtures hautak khel zo chauh mah se player inhliam Thiago Alcantara-te an dam hman - an ṭhat dan berin an inlan ve bawk.

Reds an vanduai
Real Madrid hian UCL final an khelh hnuhnung berah Liverpool hi hneh mah se Paris khawpuia final khelhah hian English club hi rinkai zawk an ni.

Reds hian beisei ang ngeiin ṭan phat aṭangin an nawr na nghal a, minute 15-na lekah Trent Alexander-Arnold cross chu Mohamed Salah-a'n goal zawnah thai phei mah se Thibaut Courtois-a'n a dang.

Minute nga hnuah Saido Mane chuan Real defender-te venna hnuaiah petna khawp insiamin goal-ah ṭha takin pet mah se Courtois bawkin a dang a, goal ban a per hial. Reds an hmuhnawm a, Real erawhin goal venhim chu hna berah an nei thung.

Real nge nge
Los Blancos hi bet viau mah se team ṭha an nih chhan first half tawp hma hretin an pholang. Tun inelnaa goal 15 khung tawhtu Karim Benzema-a'n goal chance a neih hmasak ber chu goal-ah chantir mah se offside vangin pawm a ni lo.

Minute 59-naah Real zawkin goal an khung a, ding lam aṭanga Federico Valverde shot-cross chu Vinicius Junior-a'n goal ruakah a khung.

Real-in an nawr theih chhan hi Robertson-a'n Uruguayan midfielder Valverde hmun thawl a pek vang tiin a sawi theih a; dem tur kan zawn chuan Vinicius Junior veng lotu Alexander-Arnold a dem theih ang.

Salah vs Courtois
Liverpool-in si phurh sut tumin an nawr nâ a, inkhelh hmaa 'chinfel tur kan nei' titu Mohamed Salah a khel ṭha. Egyptian forward hian box pawn aṭangin ṭha zetin pet mah se Courtois-a'n a dansak.

Belgian keeper bawk hian hnai tak aṭanga Salah khung tur chu a dansak leh bawk a, hei hi a tawpna a la ni lo. Minute 82-naah Salah-a'n Ferland Mendy tlan pelin a ke dinglamin ṭha zetin pet mah se Courtois bawkin a dang. Keeper ṭha mi Courtois zarah Real an him hram.

Chutihrualin Real hi goal tam zawk khung thei an ni a, Reds-in an nawr nat avangin vuak letna remchang ṭum khat aia tam an nei. A hmasa zawkah Benzema-a'n Vini Jr tan ball a pe na hret a, injury time-ah Dani Ceballos goal chance ṭha zet chu engmah loah a chhuah bawk.

Decimocuarta
Spanish ṭawng chuan vawi 14 tih hi 'Decimocuarta' tih a ni a, Real Madrid-in European champion an nih zat a ni a, thil namai a ni lo - a ropui takzet.

Los Blancos hi vawi 17 final an khelhah vawi 14 an champion a, anmahni hnaih bertu AC Milan aiin a letin an champion tam. An ropuina belhchhahna chu champion zinkawng a harsa.

Real hian group stage-ah Moldovan club Sheriff Tiraspol hneh loin mualpho mah se an insiam ṭha a, knockout stage-ah Europe club lian vek an hmachhawn. Last 16-ah Lionel Messi, Neymar leh Kylian Mbappe te awmna PSG an hneh a, quarterfinal-ah champion lai Chelsea hneh lehin semifinal-ah Premier League champion Manchester City an hneh.

Final-ah English club zinga Europe-a record nei ṭha ber Liverpool an hneh leh a, Real hian nomawi chawi turin khawvel league ropui bera sawi Premier League-a pakhatna aṭanga pathumna an hneh a, an hnathawh hi a ropui takzet a ni.

UCL Final - May 28, Inrinni
Liverpool 0 - 1 Real Madrid
RMA : Vinicius Junior 59'

Player inlante:
Liverpool: Alisson; Alexander-Arnold, Konaté, Van Dijk, Robertson; Henderson (Keita 77'), Fabinho, Thiago (Firmino 77'); Salah, Mané, Luis Díaz (Jota 65')

Real Madrid: Courtois; Carvajal, Éder Militão, Alaba, Mendy; Kroos, Casemiro, Modrić (Ceballos 90'); Valverde (Camavinga 86'), Benzema, Vinícius Júnior (Rodrygo 90+3')

Coach ropui Ancelotti
Football khelh a nih chhung chuan coach hlawhtling chungchuang Carlo Ancelotti hming a dai tawh lo ang. Italian manager Ancelotti hi Europe league sang pang La Liga, Premier League, Serie A, Bundesliga leh Ligue 1-a champion vek thei awm chhun a ni a, Champions League nomawi vawi li chawi thei hmasa ber a ni bawk.

Kum 62 mi Carlo Ancelotti chuan, "Champions League nomawi pali ka kawl ta mai hi mak ka ti. Hrehawm kan tuar a, champion tura kan inpekna hi duhthusam a ni. Inkhelh dan tura kan ruahman ang te a hlawhtling a, nomawi ka chawi tawhah chuan a la harsat ber ṭum a ni hial," tiin a hlawhtlinna chungchang a sawi.

An chakna thuruk sawi zuiin Ancelotti chuan, "Kan champion theih hi an ring hlawm lo. Mahse team anga inpekna, inrintawkna leh team chhung boruak ṭha bakah player mimal theihna sang zarah tun hun hi kan thleng. Last 16 aṭanga final thlengin hun harsa kan tawng a ni," tiin a sawi.

Team chhung boruak sawiin Italian manager chuan, "Madrid nen chuan Champions League champion hi a awlsam bik. Liverpool hi team ṭha tak an ni a, chak loh pawh an nei meuh lo, chutiang taka team ṭha chu final pawimawh takah kan hneh.

"Team boruak ṭha neih hi a harsa a, team chhungah mahni induh tawk ve tak te an awm ṭhin. Mahse ka team-te erawh enkawl an nuam. Dressing room hi a hahdam thlak viau bawk. Inkhelh an tih tlai pawh khan kan rilru a hahdam a, keimah ber kha ka hlauthawng. Player-ten ka hlauthawng tih an hmuh loh nan ka room-ah ka awm. An inrintawkna khan nasa takin min pui a ni," tiin a sawi.