Inter Village Football ‘dan’ ti chhuak

Mizoram Football Association chuan All Mizoram Inter Village Football khelh dan turah May 28, Inrinnni khan meeting a nei leh a, inelna kalpui dan tur a rel fel.

A hun leh hmun
Aizawla khelh tur a ni a, June thlà tawp lamah ṭan tur a ni a, khelmual biak fel a nih hunah a ṭan hun tur tak hi puan a ni ang.

Team tel theite
Mizoram chhunga Village Council leh Local Council area hrang hrang behchhanin inelna hi siam a ni dâwn a, Village Council leh Local Council area pakhat aṭangin team khat zel tel theih a ni a, a duh tan 'Joint VC' area behchhanin team a siam theih bawk ang.

Sawmna
Mizoram Football Association chuan Village Council leh Local Council zawng zawngte tel turin a sawm a, MFA chuan a hranpain sawmna a siam lo.

Hetihlai hian kan awmna area chhungah VC leh Local Council tán hmalak a remchang lo palh a nih pawhin YMA/YLA/MTP/YCA, Games & Sports Association, Sporting Club, Football Club etc tan pawh team siam theih a ni a, a hming erawh VC leh LC team hming a pu vek thung ang.

Player tel theite
Player chu a khua/veng (permanent address) emaw, tuna a awmna khua/vengah (present address) emaw a khel thei ang. Permanent address leh present address-ten player an inchuh a nih chuan player duhthlanna a lal ber ang.

Hetiang mi ni lo, veng/khaw dang player lâk phal a ni lo a, chutiang mi pawn lam player la an awma man chhuah an nih chuan Organising Board-in an chungchang a ngaihtuah ang.

Inelna buatsaih chhan
Covid-19 hripui avanga kum hnih chuang ram pum huap football inelna kalpui theih a nih loh avangin player ṭhahnem takin an tuar tih MFA chuan a hria.

Thingtlang kilkhawr ber bera player-te tán pawha inpho chhuahna remchang siam a, football club-te tán pawha player zawnna remchang siam a, football hmanga mi tam zawkin eizawnna kawng an zawh theihna turin football inelna lian tham taka buatsaih hi ṭulin a hria a ni.

He inelna hian footballer ṭha chher chhuakin, season thara club football inelna ṭan leh mai tur tana hun remchang leh boruak ṭha siam hi a tum a ni.