Volleyball thiam ber Durtlang North

Tualchhung volleyball inelna sang ber - Zothan Autoworks Pro Volleyball League-ah Durtlang North an champion, a vawi khat nana nomawi chawi tur hian Thutak Nunpuitu Team (TNT) chu 25-20, 23-25, 25-21, 25-23 (3-1) in an hneh.

Inelna hnuhnung berah Durtlang North hian final lut mah se an chak lo, tun ṭumah erawh an chetsualna ngaiah an chesual nawn lo. Lalbiakmuana telna team hian an phu ang ngeiin ropuina an hlawh chhuak.

PVL-ah hian vawi hnih champion tawh Huntharin record an nei ṭha ber. Durtlang North hma hian Anastasia leh Chhinga Veng Spikers te an champion tawh a, inelna vawi nga neih tawhah team paliin nomawi an chawi tawh tihna a ni.

A vawi khatna
Zirtawpni zan khan R. Dengṭhuama Indoor Stadium, Mualpuiah fans an inbeng muk hneh hle, volleyball hmuhnawm chhawpchhuah ṭhin a nih avangin khaw chhe kara mipui an pungkhawm tam hi a mak hran lo - final khel tur team pahnih tan phurna tham a ni.

Tuichangral hneh chunga final lut Durtlang North hian final-ah pawh bul an ṭan fuh, set hmasa ber an la. Set hnihna hloh ve bawk mah se a hnuhnung pahnih an la chhunzawm leh nghal thei a, set lina boruak san laiin Biakmuana chuan piont hnih a nei zawn.

Durtlang North tan Lalbiakmuana chu hun pawimawhah a langsar. TNT chak lohna lai a hre fuh bik emawni tih mai tur a ni, point 19 a hlap chhuak - na taka a vuak thlak bakah hmunawl remchang lai a hmu fuh ṭhin, tihsual vawi li chiah a nei zui!

Biakmuana hi D3 Business Player of the Night atan thlan zui a ni a, inelna neih chhung zawngin team innghahna a tling phak bawk. State pawn aṭanga an lakluh Sagar Malik-a'n point 28 nei mah se, ṭum 17 ngawt a tihsual avangin a hmingṭhat tur angin a hmingṭha tluan thei ta lo thung.

Ball vaw tlatu lam an langsar ṭhin, chutihrualin an vuak tura siamsaktu setter C. Zonunmawia pawimawhna sawi hmaih theih a ni lo, inkhel boruak sangah 'cool' tak maiin a ṭhiante tan ball a vawrh ṭhin, a hnathawh kha statistics hmanga sawifiah theih a ni ve lo.

TNT vanduai
Volleyball ngainatu tan chuan Thutak Nunpuitu Team (TNT) hi hriat loh theih an ni lo. Pro Volleyball League neih zawng zawnga team tel kim thei an ni. Final vawi hnih an khel tawh a, mahse a vanduai zawkah an la ṭang zel.

Tun ṭumah hian Mizo hlangin an khel. An elpui team dang panga chuan state pawn aṭangin hnam dang player an chah lut vek - TNT erawhin an chher chhuahte an ringtawk; an chher hriam zinga mi Vanlalṭanchhana (Valbuanga) hoin an champion teuh hle.

TNT hian semifinal-ah team ṭha Hunthar an hneh, beiseina sang tak nen final an khel zui. Durtlang North lakah Valbuanga'n point 18 a nei a, point 15 neitu Zosangzuala a khel ṭha bawk, anni pahnih hi khel ṭha mah se PVL-ah tawnhriat an la nei tlem a, team chakpui nan an tawk zo lo.

Champion pui zo lo mah se Valbuanga'n hriat zui a hlawh dawn. 6ft 2in a sang Kawnpui tlangval hi KT Enterprise Mizo Best Player atan thlan a ni, hma a sawn zel chuan India senior team tana khel phak tur pawhin theihna a nei - junior team lamah kohna pawh a lo dawng tawh a ni.

TNT lamin an tum ram thleng zo chiah lo mah se mipui ṭan rawn an hlawh. Mizo hlanga an khelh ngamna chuan fak a hlawh bawk; PVL an neih leh hunah pawh Muanna Veng team hian champion an tum ngei ang.