Jordan lakah India an tlawm

India coach Igor Stimac-a'n Mizo tel lohna India squad chu Jordan nen friendly match khel turin Doha, Qatar-ah a hruai a, Blue Tigers hi an elpui team lakah 2-0 in an tlawm.

Qatar Sports Club Stadium-a inkhelah hian India Hmar Chhak player tel loin India hian bul an ṭan a, India hian chance sawi tur mumal an nei lo a, first half-ah team pahnihin goal an khung loh hnuah second half-ah Jordan lam hian goal hnih an rawn khung.

Jordan tan hian kum 30 mi winger, Munther Abu Amarah chuan minute 75-naah goal hmahruai a khung a, Mohammad Abu Zrayq chuan hun pek belh minute linaah chak nemnghehna goal a khung zui.

Blue Tigers tan captain Sunil Chhetri chuan inkhel bul ṭan mah se a kum a tam ve tawh tih khelmualah hmuh turin a awm chho ṭan a, midfield lamin ball an 'supply' ṭha tawk lo bawk.

India hian kum 2022-ah match thum khelh an nei tawh a, Jordan hma hian Bahrain leh Belarus chu friendly match-ah tawngin an tlawm ve ve - Bahrain lakah hian 2-1 in an tlawm a, Belarus hian 3-0 in an sawp.

Jordan nena an intawn hmain India coach Igor Stimac chuan, "Jordan (91) hi Belarus (93) aiin ranking-ah an sang zawk a, mahse, Belarus ang emin tharum an ngah lo. Kan tan chuan Belarus aiin a awlsam tura ngaih a ni," a ti.

Mahse, media hmaah ni loin khelmualah football result chinfel a ni ṭhin a, Stimac-a thusawi a takin khelmualah hmuh tur a awm lo.

India hi AFC Asian Cup 2023 final round qualifier atan an inbuatsaih mek a, group D-ah awmin an group match bik hi Kolkata-ah khelh tur a ni dawn - Cambodia nen June 8-ah an match hmasa ber an khel ang.

Cambodia hnuah India hian Afghanistan (June 11) leh Hong Kong (June 14) an hmachhawn leh dawn a, group hmahruaitu an nih chuan Asian Cup khel turin an tling ang.

AFC Asian Cup 2023 final round qualifier-ah hian group parukah, team pali zel awmin ṭhen hran an ni a, group tina a sang ber chu Asian Cup khel turin an tling chiang ang a, pahnihna ti ṭha zual panga an tling dawn bawk.

Stimac chuan April 19 khan Asian Cup qualifier inbuatsaihna atan hian mi 41 awmna probable squad a lo puang tawh a, April 23 aṭang khan Bellary leh Kolkata-ah training an nei ṭan tawh.

Blue Tigers player koh chhinte hian ATK Mohun Bagan, Hero I-League & Hero Santosh Trophy All-Star team leh West Bengal team te nen practice match an khel a, rei tak an training ho hnuah Stimac-a'n Jordan an hmachhawn dawnin player 25 hming a puang.

Player 41 zingah hian Kerala Blasters tana season duhawm tak hmangtu K. Lalṭhathanga (Puitea), ISL player man to ber Lalengmawia (Apuia) leh Mumbai City forward Lallianzuala Chhangte te chu an tel a, mahse, 25 zingah erawh Mizo tel an awm tawh lo.

Lunglei tlangval Lianzuala hian squad a zawm lo a, Apuia hi hliam vangin a chawl mek thung. Vanglaini thudawn danin Stimac hian Asian Cup qualifier-ah tuna a squad hi koh belh a tum lo a - Asian Cup qualifier-ah Mizo hmel kan hmu dawn lo tihna a ni.