Final kan khel leh ang - Jurgen Klopp

Hmanni lawk kha chuan nomawi pali chawi an beisei a, English club zinga season khata nomawi pali chawi thei hmasa ber nih an tum. Mahse, season an kharna erawh nomawi pahnih chauh a ni - chu pawh ngaihhlut hlawh lo zawk ve ve!

Liverpool-in League Cup leh FA Cup nomawi an chawi a, Premier League leh Champions League erawh a tawp niah uiawm takin an mangṭha - Champions League final-ah Real Madrid goalkeeper Thibaut Courtois an ngam lo.

Mahse, Liverpool boss Jurgen Klopp a beidawng lo a, season thar a thlir nghal. German coach hian, "Nakkumah khawiah nge final an khelh dawn? Istanbul-ah maw? Hotel min hauhsak nghal ru," a ti!

Kum 54 mi Klopp chuan, "Season tharah final kan khel leh ang tih ka ring tlat. Ka naute hian inel nuam an ti a, season tharah team duhawm tak kan nei leh dawn a ni," a ti a, season thar a thlir nghal.

Season duhawm?
Club ṭhenkhat tan chuan nomawi pahnih chawi ringawt pawh inchhuanna tham a ni a, champion zo ta chiah lo mah se a tawp thlenga Premier League nomawi beisei thei nih a, Champions League final khelh phak pawh a ropui.

Mahse, nomawi pahnih an chân tak miau avangin Liverpool player lawm a kim thei lo a, Klopp pawhin a naute hian season duhawm tak hmanga an inngaih theih loh thu a sawi.

Klopp hian Liverpool hi Champions League final-ah vawi thum a hruai thleng ta der a, vawi khat chiah an chak - final dang pahnihah hian Real Madrid an ngam lo ve ve.

German coach chuan, "Tun din-hmunah chuan ka naute hian season duhawm tak hmangah an inngai thei rih lo a, chutianga ngaihtuahna nei tur chuan hun a kal leh phawt a ngai pawh a ni mahna," a ti.

Theihna zawng zawng
Klopp-a'n nomawi chawi ta lo mah se Liverpool tana a hnathawh hi engti zawng mahin sawi nep theih a ni lo - Europa League nena chhiar tel chuan a hnuaia Reds-in European final an khelh zat hi pali a tling.

Chu chauh a ni lo - Premier League, FA Cup, League Cup, Champions League, UEFA Super Cup leh FIFA Club World Cup-ah a champion pui vek a, nomawi chawi theih ang chu a chawi kim.

Klopp chuan a final hnuhnung ber thlirkirin, "Game ṭha tak kan khel a, ṭha famkim erawh a ni lo. Ka naute khan an theihna zawng zawng an hlan a, a bik takin 1-0 a kan hniam chiah khan kan ṭhat dan berin kan khel a ni," a ti.

Mahse, Reds hmaah Courtois a ding miau a, Belgian keeper ṭha mi hi an paltlang thei lo - Chelsea keeper hlui hian Mohamed Salah hun ṭha neih ringawt pawh vawi ruk zet a dang!

A ngui ruai e!
Liverpool defender Andy Robertson chuan, "Dressing room a reh tlawk tlawk a, final-a chak loh chuan he thil hi a thleng ṭhin reng a ni," a ti a, Reds player-te an ngui rih.

Robertson chuan sawi zawmin, "Chance tam tak kan nei a, mahse, awihawm loh khawpa khel ṭha keeper kan hmachhawn tlat a ni. Mahse, tlang taka sawi chuan kha aia ṭha zawka khel tur kha kan ni," a ti.

Liverpool hian 54% ball changin vawi 24 zet shot an nei a, vawi kua chu target-ah a kal - Courtois-a'n Mane pet goal ngei tura lang, post a lo nam per te, Salah a lo dante chu pui tak a ni. Real-in vawi li chiah shot nei mah se goal an khung zawk miau a, an chak.

Robertson chuan, "Keini chu na taka nawr mai ṭhin kan ni a, kan chhawr viau bawk. Mahse, zaninah erawh kan vanduai a, kha chu football kalphung ve reng a ni. Team tawnhriat nei ṭha tak laka comeback tum kha a harsa a, an goal khung tawh hum dan an hre tlat a ni," a ti.

Beidawng loin...
England legend Alan Shearer chuan, "Season an hman dan en ila, nomawi hlu tak pahnih chawi ta lo mah se Liverpool hi tun season-a an hnathawh avanga inchhuang tur an ni," a ti.

Liverpool hian Premier League-ah pawh match 38-ah vawi 28 hnehna an chang a, point 92 ngawt hmuin champion Manchester City chu point khat chiahin an phak lo.

Hetihlai hian Liverpool legend, tuna Aston Villa coach Steven Gerrard chuan Reds an thawh leh ngei a rin thu a sawi a, Champions League 2005-a comeback ropui lantirtu captain hian a club hmangaih chungah rinna a nghat.

Gerrard chuan, "Liverpool khan tihsual an nei tam lo. Goalkeeper leh tlarhnung ṭha tak an hmachhawn a, an vanduai mai a ni. Mahse, tuna an harsatnate hi vai kiangin, season tharah nomawi zawng zawng an beisei leh ang," a ti a, Klopp leh Liverpool a ring tlat.