Offside dan - Real goal pawm loin sawi zui a hlawh

Real Madrid leh Liverpool ten Champions League final hmuhnawm tak an pho chhuak a, minute 43-naah Karim Benzema goal khung pawm a ni lo - sawi zui a hlawh hle.

Thil thlen dan chu
Minute 44:24-naah Ferland Mendy-a'n a ke veilamin ball a pet thlawk a, box chhungah Karim Benzema-a'n ball la thlain amah vengtu Andrew Robertson bum mah se keeper Alisson a inrawlh hman. French forward Benzema hian a tiper fuh tawk lo a, mah se Ibrahima Konaté dan per chuan Alisson khup fuhin a per nawn a, he mi per hi Federico Valverde-a'n a pet.

Valverde ball pet hi Konate hian rawn tlawh hmanin chumi per chu Fabinho-a per lehin Benzema-a'n a hmaa ball lo lir phei chu goal-ah a khung. French forward hian a goal khung a lawm hmain referee Clement Turpin-a'n whistle-a ham a, goal-ah pawm a ni lo.

VAR hmangin minute hnih chung ennawn a ni a, pawm a ni chuang lo. Liverpool an him.

VAR thutlukna
VAR hmanga en let a nih hnuah Mendy-a'n ball a vawrhchhuah laiin Benzema a offside lo. Foul a awm leh awm loh en a ni a, foul hmuh tur a awm lo.

Chumi hnuah Valverde ball pet aṭanga tehin Benzema chu a offside em, tih endik a ni a, French forward hi a offside.

Goalkeeper Alisson hnungah Virgil van Dijk leh Andy Robertson te an awm a, Benzema hmaah Robertson awm mah se French forward hi Van Dijk leh Robertson inkarah a awm.

Offside danah chuan goal-keeper hnungah player pahnih an awm a, player hnuhnung ber dawttu (Van Dijk) hnunga player (Benzema) a awm chuan a offside tihna a ni. VAR hmanga enlettuten Benzema hi a offside tih an nemnghet.

Mahse maw...
Uluk taka thlir nawn chuan Benzema ball petu hi Valverde a ni lo a, Liverpool midfielder Fabinho a per hnuah a zawnah a kal.

Mahni pawl (teammate) ni lo, khingpui (opponent) aṭanga ball hmuh chuan a offside theih loh.

Valverde hian Benzema pass a tum lo a, goal-ah pet a tum zawk. Uruguayan midfielder ball pet hi Reds defender Konate-a'n tlawhin chumi per chuan Fabinho khup a fuh hnuah Benzema zawnah a kal chauh.

Referee hlui Peter Walton chuan, " Benzema kha offside position-ah a awm a, ball kha pek let an tum bawk. Fabinho kha khawih hnuhnung ber ni mah se ani kha chu ball-in a per a, tum reng vanga pass a ni lo. Liverpool player khan tum reng vangin pass se chuan offside a ni lo thung ang," tiin a sawi.

Chelsea legend John Terry erawhin Walton-a thusawi hi a nuihsawh! Terry chuan, "Eng tin nge goal-ah an pawm loh theih? Peter Walton-a'n a sawifiah a, kan lawm hle. (Tiel takin emoji a dah). Dik tak chuan a dan kha a chiang lo. Engtin nge Liverpool player-in tum reng vangin Benzema a pek theih ang. Thil chiang chu Liverpool player aṭangin ball kha chhuak a ni a, chumi awmzia chu goal-a pawm tur a ni," tiin goal-a pawm ngei tur a nih thu a sawi.

He goal pawm loh hian sawi zui a hlawhin 'expert' pawh ngaihdan a inang lo hle - an la sawi zel ang.