Champions League final-ah buaina a thleng

Pathianni zan dar 12:30-ah Champions League final en tumin kan nghak ṭhuap a, mahse, minute 35-in inkhel hi tihkhawtlai a ni - UEFA chuan ticket lem vanga buaina awm angin an sawi a, Liverpool lam chuan he thil thleng hi chhui chian turin an phut thung.

Liverpool fan-te luhna tur lam gate chu organiser lamin an hawng lawk duh lo a, fans ṭhenkhat thinrimin gate lawnliama luh an tum avangin tear gas hman a ṭul hial.

UEFA chuan, "Liverpool fan-te luhna tur lamah hian ticket lem hmanga luh tum fans sang tel an awm a, an ticket hian gate (ticket hmanga hawn ngai, khawl hmang gate) a paltlang theih loh avangin kaltlang thei loin fans an inhnawhkhawm ta a ni," an ti.

Mahse, mi tam takin UEFA insawifiahna hi an pawm lo a, Reds defender Andrew Robertson chuan, "Ka ṭhian pakhat chu a ticket chu a lem a nih thu an hrilh a, mahse, a lem a nih lohzia ka chiang a ni," a ti.

Robertson hian inkhelh hmain a ṭhianpa hi inkhel enna tur ticket hi a pe a, a lem an lo tihsak a ni - organiser lam fel loh avanga harsatna hi thleng a ang zawk mah. Robertson chuan, "Ruahmanna fel lo tak a ni," tiin a sawi bawk a, a lawm lo hle.

Liverpool chuan, "Stade de France-a Liverpool fan-ten hetiang ang harsatna an tawh a ngai hi pawi ka ti a, he inkhel hi European football-a match ropui ber pawl a ni a, zanina kan thil tawn ang kha fan-ten an tawk tur a ni lo," tiin thuchhuah an siam a, "He thil duhawm lo tak thlen dan hi chhui chian ngei kan phut a ni," an ti bawk.

Stade de France-a inkhel tih khawtlai a nih hian, "Fans ho thlen tlai avangin inkhelh hun sawn a ngai," tiin puan a ni a, mahse, BBC Sports presenter John Watson chuan inkhelh ṭan hma darkar khat velah Reds fans sang chuang, an luhtir duh loh vanga intlar an awm tawh thu a sawi.

Watson chuan, "Fans ho thlen tlai vanga inkhel tikhawtlai anga an sawi kha chu sawifiah ngaihna ka hre lo," a ti a, Daily Mail football reporter Dominic King chuan, "Engtia khatiang thil kha thleng nge ka hre lo. Tharum thawhna emaw, thuneitute beih tumna emaw engmah a awm lo a, fans ho kha thuneitute chet dan avangin lawm lo takin an awm ve mai a ni," a ti.

Liverpool fan pakhat Tyler chuan, "Inkhelh ṭan nan minute 45 a la awm tih khan kan ṭhutna tur chu a khah tawh thu an sawi a, mahse, pawnah khan fans sang tel kan la awm si a ni," a ti a, ani hian ticket lei nan £1,000 (Rs. 98,118.18) a seng.

BBC journalist Nick Parrott chuan, "A vawi khat nan pepper spray hmanga kah ka ni a, Champions League final dangah pawh ka lo kal tawh ṭhin a, hetiang hi ka tawng ngai lo.

"Gate Y pawn lamah ka awm a, darkar khat leh a chanve chhung chu hawn leh khar a inchhawk a, mahse, tumah an lut lo. Security staff-te kha rawn kalin, min rawn kap ringawt mai a ni," a ti.

Liverpool fans group Spirit of Shankly chuan, "Ruahmanna fel lo leh hlauhawm tak a ni," tiin an sawi a, Merseyside Police matchday officer-te chuan, "European match kan thawh tawhnaah chuan ruahmanna a la fel lo ber," tiin twitter kaltlangin an ziak.

Liverpool West Derby MP Ian Byrne chuan, "Ka hringnuna ka thil tawn duhawm lo ber pawl a ni. Venhimna a chhe em em a, nunna atan a hlauhawm a ni," a ti a, fans inhliam an awm loh hram a beisei thu a sawi bawk.