Last 16-ah Medvedev a lut

Daniil Medvedev chuan Miomir Kecmanovic hnehin French Open last 16 a lut. Russian player hi clay court-a inkhel thiam tak ni lo mah se, tun ṭumah hian set a la hloh miah lo, final a lut phak a nih chuan world number 1 a ni dawn.

Seeded pahnihna Medvedev hian 6-2, 6-4, 6-2 in hnehna a chang. Court Suzanne Lenglen-a inkhelah winners vawi 42 a vaw chhuak thei a, match point a hmuh theih nana a forehand te chu ropui tak a ni.

Number 1 beiseina
February thla khan Medvedev hian Novak Djokovic nek chhuakin number 1 dinhmun a lo luah tawh, mahse a awm rei lo thung. Kar khat hnu lekah result a neih ṭhat loh avangin pahnihnaah a tlahniam lehnghal.

Roland Garros-ah hian final a lut a nih chuan, a chunga awm Novak-a result ngaihchan tel ngai loin world number 1 a ni dawn, round sangah chuan player ṭha hlir an inhmachhawn dawn avangin a awlsam dawn lo thung.

Kum 26 mi Medvedev chuan, "Tun hmain Pat Rafter chu kar khat chhung world number 1 a lo ni tawh, hun rei lote chhung atan Carlos Moya pawhin a chung ber dinhmun a luah tawh bawk, eng chena rei nge number 1 an nih hi a pawimawh ber niah ka ngai lo.

"Eng chena rei pawh ni se number 1 nih theih kha a hlu, kei pawhin an dinhmun ang ka luah ve zuai kha ka ngaihlu hle. Player zawng zawngin an nih chak, mahse mi zawng zawng tan a ni si lo. Number 1 nih leh chu ka tum leh thil chak a ni," tiin a sawi.

Mangṭha Simon
Medvedev-a'n a hmachhawn leh tur chu Marin Cilic a ni dawn. Croatian tlangval hian third round inkhel dangah Gilles Simon chu straight set hmangin a hneh. Cilic hian harsatna a tawk lo, 6-0, 6-3, 6-2 in a chak nuamsa angreng hle.

Kum 37 mi Simon tan French Open match hnuhnung ber a ni nghal dawn. Tun thla tir lam khan tun season tawpah tennis a chawlhsan tur thu a puang tawh a, tournament a khelh apiang hi a tan chuan a hnuhnung ber a ni nghal zel.

Inkhel dangah Stefanos Tsitsipas a chak. Greek tlangval hian darkar khat leh minute 32 chhungin Mikael Ymer chu 6-2, 6-2, 6-1 in a hneh. A match hmasa zawkah British chhuanvawr Dan Evans chu a lo vaw thla tawh bawk a ni.

Seeded palina Tsitsipas-a'n last 16-ah chuan Holger Rune a tum dawn. Seeded pawh chang phak lo Rune hian tualchhung tlangval Hugo Gaston 6-3, 6-3, 6-3 a hnehin third round a lo paltlang ve bawk. Andrey Rublev, Jannik Sinner leh Casper Ruud te pawh an chak.