Fiahna paltlangtu Swiatek

French Open champion tura rinkai Iga Swiatek chuan fiahna a paltlang. World number 1 a nih hnuah Swiatek hian a hma a diang apiang a hneh zel a, harsatna lian tak a la tawk ngai lo - Danka Kovinic nen erawh an inkhel tawk hle, a tawpah erawh a chak ta tho.

Inrinni zan French Open third round inkhelah Swiatek hian Montenegro nula hi 6-3, 7-5 in a hneh hram a, tun hnaiah a zawnin match 31 teuh meuh hnehna a chang thei, a chak tluang rei ta hle.

Kum 20 mi Swiatek hian world number 74 Zheng Qinwen a hmachhawn leh dawn. Polish nula Swiatek chuan, "Ka khingpuite hi tun aia nawr nasat theih ka duh, mahse duh ang veka tih theih erawh a ni bik lo.

"Tihsual leh fuh tawk lo lai awm mah se keimah ka inveng ṭha thei a, a zawna tihsual rei leh point hloh nasat ka nei lo kha ka vannei," a ti. 2020 khan Paris khawpuiah hian nomawi a lo chawi tawh, kuminah a vawi hnih nan a beisei sang leh mek.

Inkhel dangah Aryna Sabalenka leh Paula Badosa te an tla. Anni pahnih an tlak takah chuan hmeichhe world number 10 chin zingah Swiatek chiah hi dam a ni tawh, player langsar leh rankings ang ho an tla nasa hle.

Seeded pasarihna Sabalenka hian set la hmasa zuk mah se Camila Giorgi chu 4-6, 6-1, 6-0 in a hneh lo. Spanish nula, seeded pathumna ni bawk Badosa pawh Veronika Kudermetova nen an inkhel a, 6-3, 2-1 a nih laiin hliam vangin a khel chunzawm thei lo.